Cheke nga miuntol

Nahimo nang kabahin sa atong mga business transactions ug sa pagpangutang ang pag-issue og post dated checks. Mao sab ni ang practice kun ikaw mag rent og balay o opisina kay mas sayon man kini alang sa atong giutangan ug sa lessor tungod kay pag-abot sa tingbayad di na siya kinahanglan nga maningil pa kondili igo nalang niyang ipa encash ang cheke nga gi-issue ngadto kaniya. Apan ang problema lang niini kun mountol ang cheke kay way igong pundo o na-close na ang account. Kana nga pangutana ang atong tubagon karon sa atong column.

* * *

Dear Atty. Divine;

Wa gyud koy sipyat nga mobasa sa imong column sa Banat News matag Miyerkules ug Domingo kay aduna koy daghan nga makat-onan niini. Nag-email ko nimo Atty. kay aduna koy problema sa akong amiga nga utangan nako. Nagnegosyo ko og alahas ug ang akong amiga nakautang nako og worth P 200,000.00 nga alahas. Mi-issue siya nako og upat ka post dated checks nga tag P 50,000.00 ang matag usa. Sa dihang mi-due na ang usa ka cheke niadtong miaging buwan akong gipa encash apan miuntol kini kay wa siyay igong pundo. Di na sab nako makontak karon ang akong amiga. Unsa may akong buhaton ani Atty? Mamahimo ba ni nako siya nga ikiha? Daghang salamat. — Jessa”

* * *

Dear Jessa,

Salamat sa imong pagsunod sa atong column. Ang pag-issue og bounced check usa ka krimen ug mamahimong makiha ang tawo nga mi-issue niini kay kalapasan kini sa Bouncing Checks Law kon B.P. 22 ug mamahimo sab siyang makiha og Estafa ubos sa Revised Penal Code tungod sa iyang pagdefraud kon pag-ilad kanimo pinaagi sa pag issue og unfunded check. Apan sa dili pa ka mohimo og legal nga lakang batok sa imong amiga, ang una nimong buhaton mao ang pagpadala kaniya og demand letter nga nagpahibawo nga miuntol ang iyang cheke ug nag-awhag kaniya sa pagbayad sa iyang utang diha kanimo. Kun mobalewala siya sa imong demand letter, mamahimo na nimo siyang ikiha tungod sa kalapasan sa balaod nga iyang nahimo. Pagkakaron, ang maayo nimong buhaton mao ang pag-adto og abogado aron sa pagpahimo og demand letter alang sa imong amiga. Hinaut nga nahatagan nako og katin-awan ang imong problema. God Bless. — Atty. Divine

* * *

Ang pag-issue og cheke dugay nang gigamit sa mga business transactions sukad pa niadtong 9th century. Apan nahimo ning popular kon inila niadtong 20th century isip paagi sa non-cash payment scheme. Kaniadto, ang Estafa sa Revised Penal Code mao ray basihan sa pagkiha kon adunay mo issue og unfunded checks apan tungod sa nagkadaghang binuang sa mga mo issue og cheke, nahimugso ang Bouncing Checks Law kon B. P. 22 aron mapahamtangan gyud og igong silot ang mga tawo nga responsable niini kay nakahatag og negatibong epekto sa atong negosyo ug ekonomiya ang maong mga binuang. Alang sa inyong mga pangutana, ipadala lang sa: LEGAL CORNER, Atty. Divine Marcial-Flores c/o Banat News, corner D. Jakosalem and V. Gullas Sts., Brgy. Sto. Nino, 6000 Cebu City or email sa [email protected]