Freedom market na

Nalipay na unta ang mga tindera ug tindero nga walay puwesto sa mga merkado sa siyudad sa Sugbo. Libre sila sa pagbalhin-balhin og paninda sa mga sitio ug barangay nga dunay tigbakay panahon sa tabo ug piyesta. Apan kalit sab nga naundang ang ginagmay nilang negosyo kay nahunong ang tigbakay dihang gisigihan og ronda sa mga polis. Tagam ang nagpasiugda sa tigbakay kay magpuli-puli ang mga polis sa pagpanghingi og kwarta pakapinan pa og bihag. Hunong pod ang mga vendors.

* * *

Nangompra ko sa Carbon Market. Dako na gyod og kalainan kun itandi kaniadto. Karon og magsubay ka sa Freedom Park, Unit I, II ug III hawan nang agian. Dili na sab baho. Nakatuman gyod si Mayor Michael Rama nga iyang pahumoton ang baho, hapsayon ang gubot, paluagan ang huot, tul-iron ang hiwi ug panindoton ang bati. Hinoon kining Freedom Park matawag nag Freedom Market kay mao namay naglabi ang mga tindahan.

* * *

Dunay lakang kaniadto nga limpyohan sa mga naninda aron mahibalik ang Freedom Park nga daghang anha maglantugi o magdebate kaniadto. Nagtuo ko nga dili na kini ipademolis ilabina kay hapit na ang eleksyon. Nahinumdom ko nga dunay opisyal sa Talisay nga napilde sa piniliay sa dihang gihugtan ang pagdili sa pagpaninda sa daplin sa dalan sa Tabunok. Dihay opisyal sa Consolacion nga napilde gihapon sa eleksyon kay giistrikto ang mga tricycle ug habal-habal drivers. Busa dili maayong pasipad-an sa mga politiko ang mga kabos kay mao baya kini sila ang impeachment court panahon sa piniliay. Basin maparehas mong Corona.

* * *

Ang Carbon Market maoy labing karaan ug halapad nga merkado sa siyudad. Naa nahimutang sa mga dalan MC Briones ug Calderon nga maoy kasing-kasing sa dakbayan sa Sugbo. Ginganlan og Carbon kay pundohanan kaniadto og carbon ang maong dapit nga isugnod sa makina para korente. Maisip nga tourist destination kay nagtanyag og barato nga souvenir ug handicraft items. Niadtong 1990’s dunay tinguha nga gub-on ang Carbon Market aron ipatigbabaw ang urbanized city. Apan napugngan sa dihang natukod ang lig-ong tulo ka mga kooperatiba nga gihiusa ngadto sa Cebu Market Vendors Development Cooperative (CEMVEDCO) nga aduna nay dul-an sa 2,000 ka mga sakop. Sila nanglimbasog nga dili mawani ang Carbon Market isip kabahin sa Cebu Heritage ug sentro sa kapanginabuhian kanilang mga vendors. Ang CEMVEDCO mao nay giila ug giabagan sa Cooperative Development Authority. (tmj_aniscal@yahoo. com/0906-648-9637)