Nagkadaghan karon ang mipadayag sa ilang reklamo nga mga sakop sa Social Security System (SSS) dinhi sa Sugbo tungod sa kadugay moabot sa ilang ID nga giingong ipadala sa ilang ulohang buhatan sa Manila apan molabay na lang ang daghang katuigan nga walay nangabot.
Si Carla Udtohan nga taga barangay Subangdaku, dakbayan sa Mandaue nga mipadangat sa iyang teklamo niining tagsulat miingon nga niadtong Septiyembre 2011 pa siya nga mikuha og ID sa SSS dinhi sa Sugbo apan wala pa niya madawat hangtod niining panahona.
Matud pa niya nga makadaghan na nga higayon nga iyang gisusi sa buhatan sa SSS sa Jones Avenue sa dakbayan sa Sugbo apan maoy kanunay itubag ngadto kaniya nga paaboton lang tungod kay ipadala kini ngadto kaniya pinaagi sa koreyo. Labing dugay pa gayod hinuon nga wala moabot ang ID sa SSS ni Francisco Ybanez nga taga dakbayan sa Lapulapu tungod kay matud pa niya niadtong 2000 siya nga mikuha og ID sa SSS apan wala pa gihapon kini niya madawat hangtod niining panahona. Si Ybanez miingon nga mahinungdanon unta kaayo alang kaniya ang ID sa SSS tungod kay gikinahanglan man kini niya ang Valid ID sa iyang mga transaksiyon sa bangko.
Dugang pa niya nga nagsige na usab siya og follow up sa iyang ID sa buhatan sa SSS apan mao gihapon ang itubag ngadto kaniya nga paaboton lang kay direkta man kining ipadala kaniya sa ilang ulohang buhatan sa SSS.Nunot niini si Ybanez miingon nga maayo unta kun ang SSS niining panahona mosundog sa mga pamaagi sa Land Transportation Office (LTO) nga dili lang paspas ang pamaagi sa ilang proseso dali pa gayod nga makuha ang plastik nilang lisensiya.
“Niana man kaha ta ron sa moderno nga teknolohiya,” ni Ybanez pa sa iyang pamahayag,” murag kinaraan man lang gihapon ilang pamaagi.”