Diha sa pagpangaon

Bisan unsa ka yano sa usa ka okasyon dili gyud nato saypon ang pagpangaon o dili ba kaha ang paghikay og yano usab nga bangkite. Tumong ug tuyo nato nga magkapundok kita diha sa pagpangaon ug magkahiusa diha sa pagbinayloay sa mga kasinatian nga nidugtong kanato ingon nga pamilya o dili ba kaha higala.Ang katapusang panihapon sa Ginoo uban sa iyang mga tinun-an ug ingon man ang atong pagsaulog sa Sagrada Eyukaristiya ang nipahinumdom kanato sa atong kalambigitan. Kay gihiusa man kita diha sa pagpangaon mahinungdanon pud nga atong hiusahon ang atong kaugalingon diha sa paggambalay og ulusahong lakang sa paglambo (Lawasnon ug Espirituhanon). Kini ang kahulogan sa pagsaulog sa Santos nga Misa. Nagkatigom kita sa maong ritwal aron atong saulogon ug saluhan ang Pulong sa Dios ug ang Lawas ug Dugo ni Jesu-Kristo aron human sa maong ritwal kita ipadala sa mas konkretong paagi,atong himoon ang pagsanong sa maong hagit sa pagpaambit ug pagpasalamat ngadto sa atong mga kaigsuonan.