EDITORYAL - Ang resulta sa gubat sa mga politiko

Pastilan kun wa mobuwag si Mayor Rama sa BOPK di tingale unta sila magbinasolay karon nganong natukod ang Busay Elementary School sa tampi sa pangpang.

Gibasul ni Mike si Joy nganong gipatampi niini sa pangpang ang maong eskuylahan, unya gipasa usab ni Joy ngadto kang kanhi konsehal Legaspi ang maong pagbasol.

Busa karon nga katumpagon na ang maong eskuylahan ug gibiyaan na sa mga estudyante, unsa may buhaton sa kagamhanan, makaluwas ba sa maong eskuylahan ug sa mga estudyante ang pag-iyahay sa mga opisyal og likay gikan sa pag-angkon sa kasaypanan?

Taym pa miingon si Joy nga wa pay dinahiliay sa yuta kaniadto dihang gipatukod ang maong eskuylahan busa wa kinahanglana kaniadto ang geohazard mapping.

Unya nagtuo siya nga pit-on siya ni Mike, aw didto niya ilamba ang tanan kang Legaspi, ngano kuno nga didto ipatukod sa tampi sa pangpang ang maong edipisyo.

Natubag na ni Joy, nga natukod ang maong edipisyo sa maong lugar kay wa man magtuo ang kadaghanan nga manahili ang yuta sa maong dapit sa umaabot nga mga adlaw, period, busa mobasul pa ba kaniya si Mike, nga natubag man niya ang pangutana sa mayor?

Si Mike nga nakahibawo ug nakasabot sa maong eksplinasyon, unsa pa man gyuy iyang mahimo kun basulon pa niya si Joy.

Unya si Joy nga gusto lang molihay , bisan nasayud siya nga husto ang iyang tubag, ug nagtuo nga daygon siya sa mga tawo kun molihay, gilamba niya og dali kang Legaspi ang tanan kay alalay kuno ni Mike.

Pastilan, naunsa na ba oi, mura man og mga bata nga iyahay lang og lihay, unya pikatay sa mata, bisan tinuod wa silay kahadlokan ug kabalak-an kay ang tawo mosabot ra man naunsa ning pagkabutanganaha.

Kay nagtuo kaha si Joy kun magbinasulay gyud di siya usa nga mabasol sa pagkatukod sa maong eskuylahan nga niadtong higayona usa man siya ka opisyal sa school board ning dakbayan?

Hunong namo nianang pinahitay oi, pangitai hinuon ninyo og solusyon nga makapadayon nga malinawon ang pag-eskuyla sa mga estudyante sa Busay, nungka nga magpunay mo og binasulay. Di ba?