Quality of education

Moinsistir sila nga kining pagdugang og duha ka tuig sa atong educational system, mao konoy makapaumento sa kalidad sa atong mga graduates. Tan-awon nato. Sa mga tambay pa, let’s to wait and see.

Ambot giunsa to sa atong mga lolo ug lola, nga sa ilang panahon, ang mga sixth grader mahimo na mang magtutudlo? Labing seguro wala silay K+12 system.

Ambot unsa ra tong graduha si Papa. Apan, kahinumdom ko nga sa panahon sa gubat, pag-landing ni MacArthur sa Leyte, didto man mi bakwet sa San Roque, Tolosa, Leyte, hometown ni Imelda, ang mga marines, nagpabarug og mga tulda (tent) luyo sa among balay, ug didto nagkampo.

Si Papa gihangyo sa mga officers nga motudlo og Spanish ngadto kanila. Ug tuod, si Papa nga alang nako, way klarong grado, nag-teach na. Mga Amerikano pay estudyante. Ingon niini ang atong katigulangan kanhi… walay K+12, apan, mga maayong lake.

Usa sa mga depekto sa atong educational system, mao nga maglisud kita’g sabut sa atong mga leksiyon tungod kay migamit kita’g borrowed language sa atong pagtungha. Ang atong medium of instruction hinuwaman.

Ang mga advanced countries dinhi sa Asia, sama sa Japan ug China, wala manumbaling sa Iningles, maoy ilang gigamit ang mother tongue, ang kaugalingon nilang pinulongan sa ilang pagtungha … lahi sa ato nga sa atong pagkahambugero, Iningles gyud.

Resulta: Samtang sila didto, lakip na ang Korea, naglumba pagkontrolar sa kawanangan, paglusad og mga satellites, space ships, mga high powered weapons, ug uban pang moderno ug hi-tech nga mga kahimanan .. kita dinhi, kutob lang gyud sa habal-habal, trisikad, surplus nga multicab, ug ukay-ukay.

Unya, sa ato nang gibalikbalik dinhi, atua kita mamalit og bugas sa mga nasud nga di kamaong mo-Iningles. Sa ato pa, aron maka-produce tag kaugalingong bugas, aron ma-self-sufficient kita sa pagkaon, wa kinahanglana ang K+12. Nagdugang lang ni sa probema.

Problema sa classroom ug teacher shortage; quality teachers; libraries, textbooks, gasto sa mga ginikanan; eraser, tisas, comfort rooms, health facilities. Sa Quezon city, nagdasok ang mga estudyante – 80 kada klase; ug ang 10,000 ka estudyante nga dili ma-accommodated tungod sa kakulang sa classroom ug teacher, ipaagi na lang kono sa home study courses, adto na lang sa balay. Makasulbad ang K+12 ini?

Kun maghisgot tag quality education, ang masulod sa atong ulo, mao dayon ang pag-Iningles .. nga kun di maayong mo-Iningles, bulok ka… di ka mahimong Senador o Congressman.

Sa ato nang gihisgutan dinhi, na-ila kita nga best in business English sa tibuok kalibutan. Lupig gani nato ang America ug ubang English-speaking countries. Apan, kutob ra ta diha. Sa ato pa, maayo lang tang moyawit ug mosuwat sa Iningles. Apan, tungod kay di man makaon ang English language, gutom ang Pinoy. Best in business English … apan, the poorest in this part of the world.

Niining atong kakabus ug kagutom, makasulbad ba ang K+12 niini? Matud ni kanhi Senate President Ernie Maceda, it’s a matter of priorities. Ang poor quality of education bay nakapa-ut-ot sa atong nasud?