Nakonbikto si Chief Justice Renato Corona tungod sa wala pagdeklarar sa tanan niyang mga kabtangan ingon man ang mga peso ug dollar bank accounts sa iyang statement of assets, liabilities and net worth (SALN). Ang pagsumiter sa SALN gimbut-an sa Article XI Section 17 sa 1987 Constitution ug Section 8 sa Republic Act No. 6713 kon Code of Conduct and Ethical Standards for Public Officials and Employees.
Nagtangag kini og waiver nga nagtugot sa Ombudsman o sa iyang authorized representatives paghiling sa maong mga dokumento. Apan ubos niining maong balaud ang Ombudsman lamang ang maka-usisa sa bank records way labut ang ubang mga tawo.
Tungod sa gihimo ni Corona nga pag-issue og waiver alang sa iyang mga peso ug dollar bank deposits nahagit ang mga dagkung opisyal sa gobiyerno sa paghimo usab og waiver. Ang mga kurakot ingon man mga tax cheats mabulgar na unya tungod niini.
Apan subo nga palandungon nga ang labing taas nga opisyal sa gobiyerno, si Pres. Aquino dili man mopirma og waiver. Dakung sayop kining iyang gihimo kay nahasupak kini sa atong gitamod nga leadership by example. Anaa ba siyay gitago?
Maayo tingaling atong ibalik ang corona ni Renato kay nakapalig-on siya sa gitawag nga transparency sa atong panggobiyerno.
* * *
Kinahanglang imbestigahon sa gobiyerno kining mga politiko nga kadudahan ang ilang SALN. Dili lisud ang pag-ila kanila.
Adunay politiko nga kaniadto iyang gideklarar sa SALN nga siya maoy ikaduhang adunahang mayor sa nasud nga karon miminus na ang iyang balor.
Naa usay politiko nga pordoy kaayo kaniadto tungod sa dako kaayo niyang utang apan karon multi-milyonaryo na. Unsa may iyang negosyo?
* * *
Ang mga lokal nga agricultural producers pinanguluhan sa Swine Development Council (SDC) mihulga nga mohimo og lima ka adlaw nga "market holiday" o welga kun ang Bureau of Customs (BOC) mapakyas sa pagpugong niining nagpadayong smuggling sa mga produkto agrikultural. Ilang gitagalan og duha ka semana si Customs Commissioner Rufino Biazon sa pagsulbad niining maong palusot.
Ang SDC, apil ang Pork Producers Federation of the Philippines, National Federation of Hog Farmers, United Broilers Raisers Association ingon man ang mga producer sa utanon, isda ug asukar nagkanayon nga kinahanglang manaug sa katungdanan si Biazon kun dili siya makahimo sa iyang trabaho.
Ang pink salmon ug cream dory ingon man ang mga Peking duck ug century egg nga gidili unta ang importasyon niini nagbaha sa atong mga merkado. Kining kinuhaan nag bukog nga manok gitugutan gihapon nga ibaligya sa mga merkado bisan kun positibo kini sa kagaw nga salmonella. Dugay na akong nagduda nga daghang gipalusot nga mga karne dinhi sa ato. Barato man unta kini apan makadaut kini sa atong panglawas ug nakasupak kini sa atong balaud.
Grabe gihapon ang kikik diha sa Port of Cebu. Natug ba o natabunan lang og papel de bangko ang mga mata ni Customs Collector Ronnie Silvestre? Mao tingali nga gitawag na kini karon nga "Tuwad na daan."
Email: msr1144@yahoo.com