EDITORYAL - Barili nabaho na kuno luoya sab

Wa na gyud kuno kaantos ang mayor sa Barili ug gisumbong ngadto sa katawhan sa lungsod nga di siya maoy tagsala sa pagkabaho sa basura sa merkado kundi ang mga konsehal nga maoy miwagtang sa budget para krudo sa garbage truck.

Nakaingon kuno ang mayor nga kun mosilot ang mga konsehal og tawo , siya na lang   nga mayor , ug di lang ipaapil ang kinabag-an sa taga Barili kay wa baya silay sala.

Apan unsa man usay katarungan  kun silotan ang mayor nga wa man kaha usab diay siyay sala ngadto sa konseho.

Kini bayang gibuhat sa mayor sa Barili pagpahibawo sa katawhan bahin sa tinuod nga tinubdan sa kabaho sa ilang basura maayo man apan naghatag baya kini og peligro sa mga konsehal sa lungsod nga maoy silbing utok sa paglaslas sa budget para wa nay ikapadagan sa trak nga tighakot sa basura.

Kay kinsa bay malipay kun nagbayad ka og buhis sa goberno sa lungsod unya di ka bugtian og maayong serbisyo ilabi na ang bahin sa kahinlo ug paghakot sa basura.

Laliman ka kun unsay mahitabo sa usa ka lugar nga maputos sa baho sa basura? magpista ang mga langaw.

Unya ang langaw ra ba motugpa sa imong pagkaon, magtiniil lang nga gikan  sa nabaho nga basura ug anha ipanarapo sa imong pagkaon, ang hugaw nga ilang natumban sa basurahan, pastilan unsa may mahitabo sa katawhan niana.

Maayo ang dagkong tawo kay usahay basta lig-on ka lang og resistensya, di man hidutlan dayon sa kagaw ang imong lawas.

Apan kun anha sa imong mga anak mahitabo, di ba mosurok ang imong dugo nga magsud-ong sa plato o kaha sa pagkaon nga gibitbit sa imong anak nga tampunsisokan sa mga maglugitom nga langaw nga gikan pa sa basura sa lungsod nga wa mahakot tungod kay ang trak nga tighakot nabara kay way krudo ug ang   pagbuot   naggikan sa mga konsehal.

Ambot di ba kaha manimawos ang katawhan sa nagbuhat sa ingon sa umaabot nga election. Di ba?