Pantawid eskwela

Nagsugod sa programang “Pantawid Pasada” karon duna nay “Pantawid Eskwela” pero niay driver nga gihagad og inom sa iyang kauban.

Buloy: Inom ta bay boundery naman.

Bitoy: Dili sa ko bay sakto ra gyud akong kita para sa PP, PE ug PK.

Buloy: Ha! Unsa ma nang PP?

Bitoy: Abang sa sakyanan gud Pantawid Pasada.

Buloy: Ang PE?

Bitoy: Bawon sa anak "Pantawid Eskwela".

Buloy: Kanang PY?

Bitoy: Para asawa likay sa saba "Pantawid Yawyaw"(Toink!/Aguy!) Yaw yaw yo! Hehehehehehehehehehehe!

Magpasalamat ko ni Land Transportation Franchising and Regulatory Board 7 Director Ahmed Cuizon sa malamposong kalihokan pag-apod-apod og mga kagamitan sa tulonghaan sa mga drayber sa pampublikong sakyanan gahapong adlawa.

Hiniusang proyekto sa LTFRB, VUDTRASCO, CITRASCO ug kahugpongan sa mga PUV operator nga gipahaom sa pagtimaan sa ika-napulog pito nga kasumaran sa DYAB Abante Bisaya karong tuiga uban sa temang "Diyes ug Siyete na, Abante pa".

600 ka mga drayber sa BUS, PUJ ug Taxi ang naaporan og mga school supplies sa labing unang proyekto sab sa LTFRB 7 ubos ni Director Cuizon pag-abli sa klase.

Dili madali pagdrawing ang panagway sa mga driver nga gikan sa kakuyaw dayon mohulip ang kamaya tungod kay ang pagtunol sa grasya diay ang tuyo sa taga-LTFRB ug dili ang pagpanakop.

LTFRB: Hunong bay! daplin daplin.

Drayber: Unsay akong sala Sir.

LTFRB: Tagaan lang ka naku og mga school supplies para sa imong anak.

Drayber: Oy! salamat sir kuyawa naku oy! nakug DNS.

LTFRB: Unsay DNS?

Drayber: Dakop Na Sad. u-turn ko sir ha para DNS inigbalik.

LTFRB:  Dakop Na Sab.

Drayber: Dili sir, Dawat Na Sab!(Toink!/Ayay!)

Hehehehehehehehehehehe!

Atol sa kalihokan nadiskobrehan ang padayong kalapasan sa ubang mga drayber. Nagpurol lang, walay set belt, nagtsinilas ug tataw nga sinapaway pagpasakay ug pagpanaug og pasahero.

Tataw man nga kalapasan kutob lang sa pahinumdom ug pahimangno ang gihimo sa mga sakop sa LTFRB tungod kay pagpaambit man sa grasya ang tumong sa kalihokan.

LTFRB: Nganong nag-short man lang ka brod?

Dryaber: Basa tanang karsones Sir.

LTFRB: Hala ingna imong Misis ha nga dili dunganon og laba ang imong karsones ug mga purol.

Drayber: Ngano man Sir.

LTFRB: Ug basa tanan magbahag ka lang sa imong sakyanan (Toink!/Aguy!) Hehehehehehehehehehehehe! 

Dili man ang tanan nagasahan paningkamotan sa LTFRB, VUDTRASCO, CITRASCO ug kahugpongan sa mga PUV operator matud ni Director Cuizon nga mas daghan pa unya ang maaporan sa sunod tuig. Natural basta kaayohan sa katawhan uban kanunay niana ang DYAB 1512 Abante Pa Bisaya.

Diyot man nga grasya diyotay’ng alibyo na sa mga anak sa manebela. Ang labing importante nga panahon sa panginahanglan dili imposible ang hiniusang lakang paghatag og tabang. Dili man abunda ang panginabuhian naa sa paningkamot ang ganghaan sa kalamposan.

Samang pasalamat akong ipaabot ni CPPO Director Patrocino Comendador nga dunay samang kalihokan sa Bagong Lipunan Elementary School sa Cansaga Consolacion. Gatosan sab ka mga tinun-an ang nakadawat og school supplies nga gipahaom sab sa kasaulogan sa anibersaryo sa DYAB.

Ang kalihokan kabahin sa tibuok bulan nga kasaulogan sa ika dise-siyete nga kasumaran sa DYAB, DIYES ug SIYETE NA ABANTE PA!.

(emailad: [email protected].)