Hepe sa kapolisan sa Talisay protektor?

Usa ka nagpakabana nga lumolopyo sa Barangay Tangke, Talisay ang nag-email kanako sa iyang sulat nga gipadala ngadto sa director sa Philippine Drug Enforcement Agency 7 kapin na sa semana ang nakalabay. Kay ang iyang email gipadala man sa director sa PDEA, akong gisabot nga iya lang akong giapilan sa pagpadala niini. Sa iyang sulat ngadto sa PDEA wala niya tagoa ang iyang pangalan ug bansagon hasta na gani ang barangay sa dakbayan sa Talisay nga iyang gipuy-an. Busa akong gisabot nga lehitimo gayod ang iyang reklamo ug hangyo ngadto sa PDEA 7.

Sa iyang sulat ngadto sa PDEA diin iya upod akong gihatagan og kopya pinaagi sa pag email niini iyang giingon nga siya nagpakabana sa ginadiling drugas tungod kay nabiktima niini ang sakop sa iyang pamilya. Kay nagpakabana, iyang gitawag ang attention sa PDEA 7 sa pagdakop kang FS ang initial sa pangalan sa tawo nga iyang gitudlo nga notadong tigpayuhotan og ginadiling drugas nga nagpadagan sa iyang ginadili nga negosyo sa dakbayan sa Talisay, lungsod sa Minglanilla, Cebu, Pasil ug Ermita sa dakbayan sa Sugbo.

Matud pa sa sulat, si FS yano kaayong nakapadagan sa iyang ginadiling negosyo sa drugas tungod kay protektado kini sa hepe sa kapolisan sa dakbayan sa Talisay ug usa ka nagngalan og PO2 Roy Lofranco. Si FS nakapahimulos usab sa protection sa iyang mga higala nga negosyante ug tag-as nga opisyal sa kapolisan nga mga puntos sa mga derby tungod kay mahilig siya sa manok ug gani aduna kini dakong fighting cock farm sa usa sa mga bukirang barangay sa dakbayan sa Sugbo. Naila usab siya sa pagsige og hatag og suborno ngadto sa mga polis diin siya nagpadagan sa iyang negosyo sa ginadiling drugas.

Sa dakbayan sa Toledo nagmalampuson ang operasyon ni FS sa iyang negosyong illegal tungod sa iyang tawo nga ginganlan og O'niel kinsa yano ra nga makadala sa ginadiling drugas pagawas ug pasulod sa dakbayan sa Toledo tungod kay escorted o kanunay kining kuyogan og polis nga nakadistino sa dakbayan sa Talisay.

Bisan sa atong pagpaningkamot, napakyas gihapon kita sa pagkuha sa habig sa hepe sa kapolisan sa dakbayan sa Talisay ug ni PO2 Roy Lofranco tungod kay dili gyod sila makontak. Si Lofranco kanunay nga off na sa iyang duty samtang si Supt. Ricamara mag ring ang telepono pero dili tubagon. Hinuon, para makuha gyod ang ilang habig ato lang gyod silang gipaadtoan og reporter.

Kun tinuod man ang mga pasangil batok sa kapolisan sa dakbayan sa Talisay dinhi makaingon ta nga ngitngit gihapon ang paingnan sa kampanya sa atong kagamhanan mahitungod sa suliran sa ginadiling drugas.