Karon nga napapas na sa radar sa Pilipinas ang “Arroyo Supreme Court” tungod sa pagkakonbikto sa gi-impeach nga chief justice nga si Renato Corona, ang sunod natong bantayan nga dili makahulma si Presidente Noynoy Aquino og “Aquino Supreme Court.”
Ang labing unang rason nganong naninguha ang administrasyon ni Aquino nga mataktak si Corona sa iyang pagkapangulo sa Korte Suprema tungod sa iyang pagka-tuta ni kanhi Presidente Gloria Arroyo.
Hasta ang mga tawo sa nasud nasuko kang Corona tungod sa iyang makanunayong paglaban ug pagpabor kang Gloria nga nakapa-apeke sa tinguha ni Aquino nga makagukod sa mga dautang buhat sa kanhi presidente.
Gani sa mga survey sa internet, radyo, telebisyon ug mantalaan, ang mga tawo nagtinguha man gyud sa conviction ni Corona. Ang mga senador nga mga dagkong politiko sa nasud, nakabig lamang sa desisyon sa kinabag-an diha sa mga survey.
Apan bisan og nakuha na natong mga yanong Pilipino ang atong gustong mahitabo kang Corona, manghinaot lang ko nga dili usab nato hikalimtan nga angay usab bantayan ang mga tinagoang agenda ni Aquino sa pagpataktak kang Corona.
Sukad pa sa sinugdanan, wala maka-eskapo ang Hacienda Luisita sa pagduda sa mga tawo nga maoy usa sa dakong hinungdan nganong si Aquino nag-apil-apil sa tinguha nga mataktak ang chief justice sa iyang katungdanan.
Pananglit kun molampos si Aquino sa iyang paghulma og “Aquino Supreme Court,” dili kaha niya ipa-utingkay og balik ang kaso sa Hacienda Luisita, bisan sa final and executory decision sa Supreme Court, aron makakuha og desisyon nga paborable sa pamilyang Cojuangco?
* * *
Ang pagpanudlo sa usa ka unibersidad usa ka mapuslanon ug bulawanon nga buhat. Langay sa panahon, apan ang pagpanudlo usa KA paagi pagsumpay, sa kaalam ug kahibalo nga nakuha sa usa ka magtutudlo, ngadto sa mosunod nga henerasyon.
Mosuporta ko sa plano ni kanhi Supreme Court chief justice Renato Corona nga manudlo sa college of law sa mga unibersidad.
Sa atong nadunggan, si Corona usa ka bantugang abogado nga taas Ug kahibalo sa natad sa balaod. Ang kaalam nga iyang napupo mapasa ngadto sa mga tinun-an.
Ang dili maayong makat-onan unya sa iyang mga estudyante mao ang iyang dili maayong pagka-testigo sa iyang kaugalingon.
Sumala pa ni kanhi DOTC Undersecretary Totol Batuhan sa iyang blog, si Corona dili maayong witness alang sa iyang kaugalingon.
Apan nalipay lang si Batuhan tungod kay matud niya, nahuman na ang tanan, sulod sa pila ka bulan nilang pagtuon sa kaso.
Si Batuhan usa sa napulo ka mga volunteer lawyers nga nagtabang sa prosecution team sa impeachment trial ni Corona.
* * *
Ihikling ta na lang kanang mga kalagot batok ni Corona. Kay kun matud pa sa mga abogado ni Corona nakadawat na ang ilang kliyente sa guilty verdict sa Senate impeachment court, maayong dawaton usab nato ang iyang mga plano sa kinabuhi human sa impeachment.
Dili hinuon kini buot ipasabot nga biyaan na lang ang iyang mga tulobagon sa balaod, tungod nianang iyang mga tinago-an nga mga kabtangan nga maoy nakapataktak niya sa pagka-chief justice.
Kay bisan sa pagkataktak ni Corona, nakahatag siya og hamili nga kabilin sa panggobyerno sa nasud – ang pagpapirma og waiver sa mga politiko ug mga dagkong opisyal sa gobyerno, apil na ang presidente, bise presidente, senador ug mga kalihim.
Sama kanako, si Corona nasubo nga diyutay lamang sa mga opisyal ang misunod kaniya pagpirma og waiver aron malili ang ilang mga tinagoan nga kabtangan.
Unsa may nakalisod niini? Diyutay lamang sa mga politiko ang nagsulti sa tinuod diha sa ilang mga statement of assets and liabilities (SALN).
Kana kaha si Bise Presidente Jejomar Binay, grabe man karon nga nakagasto og minilyon sa iyang preparasyon para sa 2016 presidential election, asa man na siya og kuwarta?