Ang tinagoan nga bahandi ug katigayonan

Giangkon ni Senador Miriam Santiago nga daghan sa mga opisyal sa gobiyerno nga nagtago og bahandi atol sa iyang pagpasabot sa iyang pagboto sa iyang pag-absuwelto kang kanhi Chief Justice Renato Corona sa impeachment trial nga natapos sa miaging semana.

Matud pa ni Senador Santiago nga naandan na sa dagkong opisyal sa gobiyerno nga motago og bahandi o katigayonan nga lisod lang masakpan tungod kay ang kadaghan kanila gibutang man sa pangalan sa mga kabanay o sa laing tawo nga kaha maoy ilang piniyalan.

Gipasabot ni Santiago nga matinud-anon lang si kanhi Chief Justice Corona tungod kay wala man kini niya buhata nga ibutang sa laing pangalan ang minilyon nga salapi ug minilyon niyang dollar accounts. Sa pagpadayag ni Senador Santiago mahitungod niini daghan ang nakaingon nga dugay na nga gihuhungihong nga gihimo kini sa mga dagkong opisyal nga magtago og bahandi ug katigayonan pinaagi sa pagbutang lamang sa laing pangalan.

Nunot niining maong mga katahap nga nahitabo karon sa atong katilingban maoy sugyot sa kamahinungdanon gayod sa pagsusi sa gihuptan nga bahandi og katigayon sa pribado nga mga tawo.

Ang mao nilang sugyot maoy hingpit nga pagwagtang sa tinagotagong pangurakot sa mga dagkong opisyal sa gobiyerno nga nahimong gikakonsabo ang pribadong mga tawo.

Gitataw nila nga kun himoon sa gobiyerno nga ilakip sa pagsusi ang mga katigayonan ug bahandi sa pribadong mga tawo maoy ilang gipaniuguro nga mahingpit usab ang tinguha ni Presidente Noynoy Aquino nga mahingpit ang pagpakgang sa pangurakot sa mga opisyal sa gobiyerno.

Dugang pa nila nga dili lisod nga subayon ang katigayonan nga gihuptan sa pribado nga mga tawo pinaagi ang pagsuta kun giunsa sa pagpanag-iya ang maong bahandi ug katigayonan nga gitago niini ngadto sa katawhan ug sa publiko.