Naunay Sa Tari

Bisan ang usa sa mga volunteer lawyers sa prosecution panel ni Chief Justice Renato Corona miangkon nga dili gyud lig-on ang articles of impeachment nga gipasaka sa kongreso didto sa Senado.

Admitido sab si manlalaban Aristotle Batuhan nga ang nahimong lig-on nga hinagiban sa administrasyon ni Presidente Aquino paghakot og suporta gikan sa mga kongresista sa huyang nga impeachment complaint mao ang pork barrel.

Apan taliwa sa pag-angkon ni Batuhan nga lugak ang kasong ilang gipasaka, nganong nakonbikto sa Corona?

Si Batuhan miingon nga ang pagkatangtang ni Corona dili tungod sa maayong laki nga mga abogado nga naglangkob sa prosecution, labaw nang dili tungod sa maayo nga mga pleadings ug ebidensiya nga nahipos sa prosecution.

Simple ang hubad ni Batuhan sa pagkakonbikto ni Corona. Ug kini tungod sa iya mismong kaugalingon nga testimoniya.

Matud ni Batuhan nga si Corona maoy labing dakong ebidensiya batok sa iyang kaugalingon.

Ang pag-angkon ni Corona nga wala niya itug-an ang $2.4 milyones ug P80 milyones nga deposits diha sa iyang SALN maoy hinungdan sa iyang pagkakonbikto.

Kun pabilin pang nagpakahilom si Corona ug wala manghagit nga motestigo si Ombudsman Conchita Carpio Morales posible unta tingali nga dili makakuha og igong gidaghanon sa boto gikan sa mga senador aron siya makonbikto.

Gani mismo si Senate president Juan Ponce Enrile nga mihimo og listahan sa mga senador nga posible nga mobotar pabor sa conviction miangkon nga wala gyud makaabot og 16 ang sigurado nga mobotar alang sa pagkakonbikto ni Corona.

Ang listahan ni Enrile nagpakita nga duna lay 11 ang sigurado nga mobotar pabor sa conviction samtang siyam silang wala pay hukom ug tulo ang pabor ni Corona.

Sa ato pa kun wala masipyat si Corona hayan dili gyud makuha ang 16 botos nga gikinahanglan aron siya makonbikto.

Nakadugang sa dakong palpak ni Corona mao ang iyang pagkaarogante.

                             Nakasamot sa sitwasyon ang iyang pag-insulto sa mga senador dihang mi-walkout siya sa unang adlaw sa iyang pagtistigo. Husto ang obserbasyon ni Batuhan nga ang naglaundok na nga mga sayop ni Corona sulod sa 20 niya ka tuig sa serbisyo sa gobyerno maoy milubong niya sa hingpit.

* * *

[email protected].