Abuso sa drayber sa PUJ ug taxi

Hingpit na nga magsugod ang klase alang sa tuig tingtungha karong Lunes, Hunyo 4 niining tuiga nga gilauman nga maoy masinati ang daghan na usab nga pasahero nga maglumbay sa kadalanan niining mga higayona.

Gipaabot nga masinati ang daghan nga maglumbay sa kadalanan nga mga pasahero sa panahon sa peak hours sa buntag sanglit magkadungan man ang mga tinun-an sa pagpaingon sa ilang tulunghaan ug ang mga kawani nga mopaingon usab sa ilang tagsa-tagsa ka mga trabaho.

Ang laing oras nga daghan usab ang mga pasahero panahon na usab sa ilang pagpamauli sa panahon sa hapon sanglit makadungan man usab ang mga tinun-an ug ang mga trabahante sa ilang pagpamuli.

Daghan ang nag-ingon nga sa matag higayon nga daghan ang pasahero masinati usab ang pag-abuso sa mga drayber sa taxi ug PUJ tungod ilang pahimuslan ang maong kahigayonan.

Naglakip sa mga abuso sa drayber sa taxi mao ang pagpili og pasahero nga mosakay kanila ug   ang uban dili mogamit sa ilang metrohan kay ipaagi na lang sa pakyaw ang ilang pagpaningil sa plitehan.

Samtang ang mga drayber sa PUJ maoy ilang himoon nga abuso mao ang dili paghatag og diskuwento sa mga tinun-an ug ang pagpatuyang og pasakay ug maglisod sa paglingkod ilang mga pasahero.

Dugang pa nila nga ang labing pait pa gayod kun ang mga drayber sa PUJ dili na molahos ngadto sa ilang mga rota kay magdali man og balik kay daghan pa ang mga pasahero nga nagpaabot kanila.

Nunot niining gipaabot nga mahitabong abuso sa mga drayber sa publikong sakyanan daghan usab hinuon ang miangkon nga igo lamang sila sa pagbagolbol kay dili man usab sila mopadangat sa ilang reklamo ngadto sa Land Transportation Franchizing and Regulatory Board (LTFRB) 7 o sa Land Transportation Office (LTO) 7 nga maoy mopitol sa abusadong mga drayber.

Matud pa nila nga dili na lang sila maghasol pa sa pagreklamo kay gawas nga mahasol pa ang ilang kaugalingon masinati usab nila ang kalangan sa ilang trabaho kay nagkinahanglan pa man nga moatubang sila ngadto sa maong buhatan. (Romeo T. Limpangog)