Ang mga lalaki nga magpolis kinahanglang may gitas-on nga 5’4” samtang 5’2” ang babaye, giisip nga usa ka discriminating requirement hinungdan nga may balaodnon nga nag-ung-ong karon sa ubos bay balaoranan nga wagtangon ang maong panginahanglan o height requirement sa magpolis.
Kun kaaprobahan ang maong balaodnon ngadto sa hingpit nga pagkabalaod, tanang aplikante sa pagka-polis maunano man siya o mahigante, puwede ra siyang dawaton pagkapolis.
Basta mopasar lamang siya sa ubang mga kwalipikasyon sama sa pagpasar sa oral ug written examination, neuro test, medical test, ang mga nagkalainlaing training pagsukod sa iyang physical fitness ug uban pa bisan unsay gitas-on niya maturotoy man o kaha murag tower ang gitas-on, puwede ra.
Kay unsa ba diay nagpaluyong katarungan nganong gipatuman sa kapolisan ang height requirement sa mag-polis, kini tungod kay ang standard nga gitas-on nga ilang gibasehan karon sa mag-polis, maoy kasarangang gitas-on sa mayoridad sa mga Filipino.
Busa sa hinarongany o kaha linayugay, di kaayo daling malupig ang usa ka polis tungod kay ikasukol man niya ang iyang gitas-on kun kinamot o manu-mano lang ang away sa higayong mosukol kaniya ang tawo nga iyang dakponon.
Gumikan niini, layo ra kaayo ang kahigayonang molanit siya sa iyang armas aron pusilon ang iyang kontra, kay malupig man kini niya sa pakusog.
Apan kun ang gitas-on sa usa ka polis, amboan lang sa iyang kontra nga kriminal, unsa may tendency nga mahitabo, aw maniguro gyud ang maong polis nga di siya iwisi-wisi sa iyang kontra kun manu-mano ang kombati.
Di na mosalig ang maong polis sa iyang lawas ug ang tanan tua na isalig niya sa iyang armas sa katarungan nga igo lang siyang mohimo og self defense. Busa ang mahitabo sa tanang polis nga turotoy, maoy mas daghan og mapusilan kay sa mga polis may hustong gitas-on sa lawas.
Hinuon kining tanan mag-agad ra sa desisyon sa mga tag-as nga opisyal sa kapolisan sa higayong mahingpit nga balaod ang bahin sa pagwagtang sa height requirement sa magpolis. Di ba?