Unsay sunod?
Karon nga natangtang na si Chief Justice Renato Corona hinaut nga makab-ot na sa nasud ang kausaban ug ang reporma nga dugay na nga gisaad ni Presidente Aquino apan dili kuno niya mapatuman tungod kay si Corona nahimong babag niini.
Agi og pagpakita nga seryoso siya sa reporma nga dugay na niyang gisaad, mas maayo nga mopakita siya og ehemplo pinaagi sa pagpirma og waiver aron tugotan ang Ombudsman nga masusi ang iyang mga bank accounts.
Bisan way pasangil sa korupsiyon batok niya apan ang usa ka maayo nga lider kinahanglan nga maoy mohatag sa ihemplo.
Gawas sa pagpirma og waiver maayong sugdan ni Aquino sa husto ang pagpili sa mosunod nga Chief Justice.
Daghan ang mga pangalan nga mitumaw karon nga posibling ihulip ni Corona. Pipila sa mga mitumaw mao si Senador Franklin Drilon ug BIR commissioner Kim Henarez. Apil sab sa gitan-aw mao ang Sugbuanon nga si Court of Appeals associate justice Gabriel Ingles.
Nindot unta og laing Sugbuanon ang sunod nga Chief Justice apan dunay problema tungod kay dili mamahimong motudlo si Aquino og hulip ni Corona gawas sa 14 ka kasamtangan nga mga justices.
Matud ni Senate President Juan Ponce Enrile nga kinahanglang gikan sa Korte Suprema ang itudlo ni Aquino sanglit wala may Judicial and Bar Council nga mohimo sa screening.
Ang JBC gipangulohan ni sa chief justice apan tungod kay natangtang man si Corona way mo-convene niini.
Busa walay makapili og mga aplikante alang sa pwesto. Ang angayang buhaton ni Aquino mao ang pagtudlo og usa sa mga justices sa SC nga mohulip ni Corona.
Hinaut nga sundon ni sa presidente ug dili mamunit sa iyang mga amigo nga sakop sa KKK aron ihulip ni Corona.
Dinhi na masukod ang katakos ni Aquino pagdumala sa nasud. Kun tinud-anay siya nga dunay programa alang sa kausaban sa nasud.
- Latest
- Trending
