Usa ka single mother

Usa sa mga mihuman sa ilang kurso sa kolehiyo ning tuiga mao si Gilda, 45, usa ka single mother. Si Gilda (dili tinuod niyang ngalan) migradwar sa kurso nga animal husbandry, diin gi-major niya ang poultry management.

* * *

Tagsaon ang kruso nga gi-eskuylahan ni Gilda apan bisan sa wa pa siya makagradwar aduna na nay dakong food conglomerate sa Metro Manila nga misaad kaniya’g trabaho.

* * *

Si Gilda naminyo sa usa ka lalaki nga drayber sa heavy equipment sa gobyerno. Human siya nanganak og batang lalaki, gibiyaan siya ug ang ilang anak sa iyang bana.

* * *

Nanginabuhi si Gilda isip labandera ug samtang siya nagtungha nagpadayon ang iyang pagpanglaba sa mga bulingon sa iyang mga kaparintehan ug mga higala. Ang suhol nga iyang nadawat maoy gigasto niya sa pagbuhi sa iyang anak ug sa pag-eskuyla.

* * *

Nganong nakahunahuna man siya’g kuha sa kursong animal husbandry? Dili kuno kini maoy iyang gustong tun-an apan duna siya’y nakaila nga babaye (iyang ginganlan og Madam Lenora) nga hepe sa human resource department sa usa ka dakong food products conglomerate didto sa Manila.

* * *

Misugyot si Madam Lenora nga animal husbandry ang iyang kuhaon sa kolehiyo ug gisaaran nga inig kahuman niya segurado na ang iyang trabaho.

* * *

Ug mao nay nahitabo. Paghuman niya sa iyang kurso, gi-employ dayon siya sa maong food firm. Tagsaon man gud ang babaye nga nagkupot og degree sa animal husbandry.

* * *

“Mosugod si Gilda sa iyang trabaho didto sa Manila unya sa Agosto, apan bisan karon pa nagdawat na siya’g employment bonus nga daku-dakong kantidad.