Kun motubag pilde, kundi motubag pilde.. paita..
Kining panultiona ba, kasagarang mabati sa mga debatista sa relihiyon nga kun makita sa usa ka kontra nga talisukamod na ang iyang kaatbang , bundakan dayon og labing lisud nga pangutana nga kun tubagon sa kontra niya pilde, kun di tubagon samot nang pilde.
Mao kini nahitabo kang CJ kinsa ato nang giingon sa nahauna natong mga editorial nga kun sad-an siya mas maayo pa og di siya moatubang sa impeachment court kay sa magpaka-aron ingnon siyang way sala unya siya na hinuoy nagpamatuod atubangan sa mga misaksi kaniya sa tibuok kalibotan sa iyang pagkasad-an
Usa ka kinalabwang maghuhukom sa nasud maoy unang mipakita sa iyang ka walay respeto sa mga gitan-aw niyang gagmay nga maghuhukom
Asa naman ang sagradong panultihon nga nag-ingon, "if you want others respect you, please show first your respect to them."
Usa ka respondente sa kaso mao ray mihukom sa iyang kaugalingon nga wa siyay sala human niya kulataha ang Presidente sa nasud, mga magbabalaod nga mipirma sa iyang impeachmenrt, mga huwes nga senador, Ombudsman ug uban pa sud sa tulo ka oras nga opening statement.
Pagkahuman niya og pamatuod nga limpiyo siya og binuhatan misirit nga way pananghid sa mga maghuhukom sa iyang palibot mura sa tawo nga human mopungko paglabay sa iyang hugaw mitindog nga way lingi-lingi sa iyang gipungkoan.
Ang mga senador nga nagtuo nga maka-cross examine sila ,murag gikilatan nga wa kapanguros ug igo nalang nahasiga ang mga mata dihang nawagtang sa ilang atubangan ang labing halangdon nga huwes sa nasud.
Unya mibalik nga nagsakay na og wheelchair, wa nay tingog-tingog aron may igong katarungan siya ug ang iyang mga abogado nga di siya angay’ng imbistigahon tungod sa tandugon niyang kahimtang sa lawas. Ang pag-atubang ni Corona sa maong hukmanan daan nang gipasigwar sa iyang mga abogado nga maoy katapusan nilang baraha nga mohatag og sinyas sa ilang kadaogan o kaha kapildihan.
Ambot sa mga nakasaksi sa maong eksena niadtong Martes, unsay tan-aw ninyo sa maong baraha, timaan sa kadaogan sa depensa o nagtataw sa ilang kapildihan. Di ba?