Nalipay-lipay unta ang mga motorista kay mipakunhod na usab sa ilang presyo ang mga tigbaligya og petroleum products kagahapon, apan pwerte ra usab nga gamaya.
Tiaw mo nga 60 sentimos ra man usab ang gipakunhod nga kantidad sa mata’g litro sa gasolina. Ang tulo na ka sunod-sunod nga pagkunhod sa presyo sa fuel products takulahaw lang unya nga malabwan sa usa ka daku nga pagpatuman og umento.
Tabla ra ba nga giduwa-duwaan ra kita sa mga dealer og petroleum products kay kun mopakunhod, ginagmay. Apan kun mopaumento sila pwerteng dagkoa, usahay tag kapin sa pesos ug usahay P2.
Tungod niini, agwanta na lang tawon ko nga masunog ang akong bukton sa kainit sa adlaw tungod sa pagsigi’g sakay og motor. Kun mag-awto gud, pastilan mohurot man og gasolina nga mga usa ka litro sa matag walo ka kilometro nga dagan.
* * *
Dugang palas-onon sa mga tag-iya’g sakyanan. Mora’g may lakang na usab ang kadagkoan sa Land Transportation Office (LTO) nga sa dili pa irehestro ang usa ka sakyanan kinahanglan nga pangitaan ka og “Early Warning Device.”
Kining gitawag og Early Warning Device mao kanang porma og triangle nga mo-reflect gani kun mahayagan nga sagad ibutang luyo sa mga sakyanan nga maabereya sa karsada.
Aw, nindot man hinoon ang resulta niini kay layo ra sa peligro kay ang nagsingabot nga mga drayber sa nagdagan nga sakyanan makabantay man nga ang sakyanan nga iyang padulngan naabereya.
Pastilan, tali-parehestro ra ba ko sa akong mga sakyanan da, dugang gastohan gayud ni. Ang gikuyawan nako kun dili kini tumanon sa mga motorista, igo lang unya sila manghuwam og EWD sa ilang mga amigo kun moparehestro.
Kinahanglan gayud nga ang drayber magdala-dala og EWD kanunay. Basin mahisama unya kini sa lagda nga ang mga motorista kinahanglang adunay mga “tools” kun sila mobiyahe na, apan wala tumana.
Daghang mga drayber nga wala masayud nga apil kini nga sila madakup kun wala sila ani.
* * *
Sa operation sa Land Transportation Office (LTO)-Task Force Alpha didto sa Katipunan Street, Labangon kaniadtong miaging hapon, ubay-ubay lang gihapon nga mga drayber ang nadakpan.
Tan-aw nako bisan asa nga lugar, daghang mga malapason sa balaud sa tukmang pagmaneho og sakyanan. Labi na gayud diha sa mga hilit nga dapit nga nagtoo nga wala nay manakop.
Usa ka tawo nga nagtoo ko nga sakop og reliheyoso nga grupo, nadakpan kay ang babaye nga iyang angkas wala man magsul-ob og crash helmet samtang nagsakay sila’g motor.
Gidakop gayud sila sa mga sakop sa LTO, ilabi na nga duna man diay sila’y helmet apan wala lang gayud isul-ob. Mora ba og wala gayo’y tahud sa balaud. Malooy lagi unta ta kay mahal ra ba ang multa apan kinahanglan kini aron ma-leksyon.
* * *
Kamong madakpan, ayaw gayud panuborno aron mausab ang batasan sa mga law enforcer. Imbis tag-usa ra man unta ang akong sagad i-charge sa violator, gitulo na lang nako kay nauwaw ko nga gisuwayan og suborno.
Sulod sa upat ka tuig na nako nga nahimong deputized agent sa LTO, giampingan nako ang akong dungog kay gusto nako nga mobalik ang maayong imahe sa mga road enforcers.
Sa mga higayon nga dunay mosuway og suborno nako, aw magmahay hinoon.