Way buhis, wala sa'y increase

Nindot ang lakang sa mga konsehal sa dakbayan sa Sugbo nga bugti sa dili pagpausbaw sa bayranan sa mga pribado nga eskwelahan, ang Cebu City government dili usab mokolekta kanila og business taxes.

Maayo unta og ang mga tagdumala sa mga pribadong tunghaan dili modayon sa pagkolekta og dugang usbaw sa ilang bayranan gikan sa mga tinun-an kay mohatag man kanila og benipisyo ang City Hall.

Giuyonan sa mga sakop sa Cebu City Council ang sugyot ni Sangguniang Kabataan (SK) Federation President John Philip Po nga ang City Hall dili lang usa mokolekta og business taxes sulod sa usa ka tuig niadtong mga tunghaan.

Klarohon nako nga ang makapahimulos nga mahimong dili lang kolektahan og business taxes mao kadto’ng mga tunghaan nga giaprobahan na nga mopausbaw sa ilang tuition fees, kun dili nila idayon ang pagpasaka sa ilang bayranan.

Nalooy ang mga konsehal kay dili sayon ang pagpatungha karon sa koliheyo, bisan gani sa mga pribado nga high school. Ang mga four-year courses pagka karon dili mominus sa P18,000 ngadto sa P35,000 ang tuition fees semester diha sa mahalong tunghaan.

Bisan gani og ang usa ka tinun-an scholar pa sa dakbayan sa Sugbo nga makapahimulos og P10,000 ang semester, dili maka-afford kay kinahanglan man nga modugang sila sa paggasto pun-an pa sa matag adlaw nga gastohan.

Maayo unta og adunay mga pribado nga tunghaan dinhi sa dakbayan nga mopahimulos niining tanyag kanila sa City Hall.

* * *

Dalia ra gayud nga mangligid sa katuigan. Gikontak ko sa higala ko nga reporter nga si Oscar Pineda ug gisultihan nga ang karaan namo nga hulagway sa mga sakop sa DYLA News Team usa sa ipasundayag atul sa Press Freedom Week karong Septiyembre.

Gipadala kanako ni Oscar ang maong karaang hulagway kay tungod sa kadugay na, wala na gani siya mahinumdom sa mga ngalan sa uban. Nakuha ang maong hulagway sulod sa announcer’s booth sa DYLA adto pa’ng 1994. Diha sa hulagway ang kanhi DYLA general manager nga si Cerge Remonde sa wala pa kini mahimong opisyal sa Malacañang. Kay ako man kaniadto ang news direktor sa DYLA atul sa maong higayon, natural diha ko sa iyang tuo.

Dunay uban nga diha sa hulagway nga dili ka na gani makaila kun itandi nimo karon sa ilang dagway. Dili tungod kay migwapo kon dili, nausab lang ang ilang panapot.

Gisud-ong nako ang hulagway ug nakapanglingo-lingo ko tungod kay daku na kaayo ang kausaban. May kauban ko nga bata pa kaayo og dagway sa hulagway, apan karon dili na ikalimod ang edad.

Samtang nagsud-ong ko sa maong hulagway, gihandom nako ang panag-uban namo kaniadto ni Mr. Remonde, nga nakatabang usab kanako nga mitudlo og kinaadman kabahin sa management.

Gilingi nako ang akong utang kabubot-on ni Mr. Remonde. Matud pa bitaw sa panultihon nga kadtong dili makamao molingi sa iyang gigikanan, dili makaabot sa buot niya padulngan.

Unya atul sa Press Freedom Week, saulogon usab ang sumad sa adlaw’ng natawhan ni Mr. Remonde. Matinabangon nga pagkatawo si Mr. Remonde. Usa siya sa girespitohan nga sakop sa media dinhi sa Sugbo.