Nadamay sa bersikulo

Dakong isyu karon didto sa Amerika ang kontrobersiya nga gikalambigitan ni Manny Pacquiao sa pamahayag niini mahitungod sa gay community. Gipangutana man gud siya sa usa ka journalist didto nga uyon ba siya sa same-sex marriage.   

Tubag pa niya nga dili gayud siya uyon isip usa ka Katoliko. Apan ang iyang pamahayag gipun-an man hinuon sa journalist nga Granville Ampong og mga bersikulo sa Bibliya nga nagkondena sa mga bayot ug tomboy ngadto sa kamatayon. Daghan hinuon ang mipiyait didto sa Estados Unidos, diin dakong porsiyento sa populasyon mga liberal. Gani adunay pipila ka mga estado sa Amerika ang mi-legalize sa same-sex marriage. Tungod sa maong kaguliyang, daghan ang misakay. Apil na ang usa ka mall nga mi-banned kang Pacquiao. Adunay nanawagan usab sa Nike nga tangtangon si Pacquiao isip usa sa mga endorser niini.

Walay laing nahimo ang Pilipinong kampiyon kondili ang dali nga pagdepensa sa iyang kaugalingon. Sipyat kuno to sa writer kinsa mipuno pa og mga bersikulo sa Bibliya nga wala mismo gibungat ni Pacquaio.

Mao kana ang gitawag og irresponsible journalism. Sa iyang pagsulat sa opinyon ni Pacquiao iya hinuon nga gisagolan og iyang personal usab nga opinyon hinungdan nga ang nakabasa mituo nga opinyon kadtong tanan sa boksidor. Apan kun akoy Pacquiao, wala na lang unta niya sakyi ang pangutana nga uyon ba siya sa same-sex marriage. Wala na lamang unta siya mitubag tungod kay lahi ang kultura didto sa Amerika. Kini tungod kay gisagop na ang same-sex marriage didto sa pipila ka mga liberal og mga paghunahuna. Kining bag-ong kontrobersiya lain na usab nga distraction sa training ni Pacquiao sa iyang mga umaabot nga away batok sa tang-ang Amerikanong si Timothy Bradley sa sunod buwan.

Lig-on si Bradley gumikan wala pa kini pildi. Ug dili gayud angay ang atong pambato nga mokumpiyansa. Hinuon kun mokumpiyansa si Pacquiao, dako ang posibilidad nga ma-knockout pa gani siya.