Unsa'y lagda sa Comelec?

Dunay balaud nga naglatid nga kadtong mga tawo nga gusto’ng magpapili sa mga elective position sa kagamhanan, kinahanglan nga lumulopyo sa dapit nga adto siya molansar labing minus usa ka tuig sa dili pa ang eleksyon.

Dunay mga tabi-tabi nga si Talent Manager Annabelle Rama, inahan sa artista nga si Ruffa Gutierrez, molansar kuno pagka kongresista sa north district dinhi sa dakbayan atbang sa mga Del Mar.

Matud ni Cebu City Election Officer Marchell Sarno nga hangtud kaniadtong miaging adlaw, si Annabelle Rama o Annabelle Gutierrez wala pa sa ilang rekord sa mga registered voters.

Kun magparehestro si Annabelle karong mga adlawa, natuman ba niya ang gilatid sa balaud nga “one year residency period?” Gikareport hinoon nga si Annabelle dunay napalit nga balay diha sa Barangay Zapatera. Si Sarno miingon nga bisan og milapas na ang Mayo 12, dawaton gihapon nila ang pagparehestro ni Annabelle ug kun adunay moreklamo, ila kini nga resolbahon.

Ambot nakabantay ba kamo nga si Gobernador Gwen Garcia mibalhin pagparehestro gikan sa Dumanjug ngadto sa Barili sa wala pa ang Mayo 12? Gihimo usab kini ni Sonny Osmeña nga nagparehestro sa Toledo City.

Siniguro ang gihimo nila ni Gwen ug Sonny kay nanagana sila nga basin og kun moparehestro sila lapas sa Mayo 12, tingali’g dunay moreklamo, masamok na.

Apan sigurado ko nga ang mga Del Mar dili mohimo niini nga usa ka isyu. Bisan og ilado si Annabelle Rama tungod kay inahan siya ni Ruffa Gutierrez, apan mas ilado ug gipangga si Del Mar sa katawhan sa north district. Maayo nga dili lang kwestyonon sa mga Del Mar ang maong “legality” sa “one-year residency” ni Annabelle kay abi pa lang nahadlok sila. Kun ako lagi ang pangutan-on, wala pay makapilde sa mga Del Mar sa north district.

Sa mga panginahanglan gud sa katawhan, ilabi na sa kahimtang sa panglawas, anaa kanunay ang mga Del Mar.

* * *

Nalipay ko nga nakabantay nga ang ubang drayber og motorsiklo nga gigamit isip “Habal-habal” nagbutang na og side mirrors ingon man duna nay mga crash helmets, apan usahay lagi dili gamiton. 

Nakabantay tingali sila nga usahay ang Land Transportation Office (LTO) mohimo’g kinalit nga operation batok sa mga masinupakon sa balaud. Kaniadtong miaging semana, nakalitan ang mga habal-habal drayber didto sa JY Square.

Dayon, sa miaging Miyerkules pwerteng daghana nga nadakpan sa laing kinalit nga operation sa LTO didto sa Talamban. Apil nga nadakpan ang usa ka polis nga masinupakon sa balaud.

Tiaw mo, ang iyang plate number sa iyang motor anaa gibutang kilid sa makina, unya walay suga sa luyo sa motor ug wala pa gayo’y side mirrors. Klaro kaayo nga gisupak niya ang balaud.

Awhag nako sa mga polis nga tumana lang gayud ninyo ang balaud. Kun ibutang nato nga ang inyong minahal sa kinabuhi madam-agan og motor nga ang plate numbers anaa sa kilid gitagoan, walay makaila unsa nga sakyanan ang nakadam-ag.

Ingon usab niini ang sitwasyon kun ang original nga plate number sa sakyanan nga anaa sa atubangan tangtangon ug ilisan sa mga commemorative plate nga “NBI75”, “PNP111” ug “PMA-PNPA.”