Bangon Pinoy

Karong duna nay lama ang relasyon sa Pilipinas ug China nunot sa isyu sa Panatag shoal nga giangkon usab sa China dunay dakong kahigayonan sa mga Pilipino nga moasenso pinaagi sa kaugalingong abilidad.

Ang China maoy usa sa labing dakong tigsuplay kanato og mga nagkadaiyang gamit gikan sa dagom, papel, tools ngadto na sa mga heavy equipment nga mapalit sa baratong presyo tungod sa ubos kaayong kalidad.

Ang China nasayod nga dakong gubot ug gastos ingon man peligroso sa ilang habig kung aktwal nga makiggiyera sa Pilipinas, karon taktikang ‘economic war’ ang ilang gigamit pinaagi sa pag-deny sa atong mga produkto didto ug uban pa.

Mahimo sad nga mopahamtang ang Pilipinas og susamang taktika sa mga gi-export sa China dinhi nga maoy sagad paliton diha sa namunginging mga “Chinese stores” sa kadalanan.

Dugay na kitang nagsige og reklamo batok sa mga sub-standard nga produkto sa China, daling masunog, peligroso sa panglawas ilabi na sa mga bata ug uban pa, apan walay lapad nga gihimo ang atong gobiyerno batok niini gawas lang sa panagsang “tusik-tusik” nga raids sa mga tindahan.

Kung pangrondahon sa Department of Trade and Industry ang mga tindahang namaligya niining mga sub-standard nga mga paninda ug higpitan sa Bureau of Customs ang pagsulod sa mga Chinese products nga sinuwat sa pinulongang Intsik ug walay mga marka sa International Standards, maghatag kini og senyales ngadto sa China. Samtang buhaton kini sa gobiyerno, mao na kini ang higayon sa atong local manufacturers, ilabi na sa mga nanirado tungod sa pagsulod sa mga Chinese products, nga buhion ang ilang industriya ug mopokus sa atong local market.

Partikular niini ang industriya sa paghimo og school supplies, gamit sa mga balay gikan sa plato, kaldero, kutsara, sabon, ug suwayang makigkompetensya sa ubang produktong gikan sa China .

Aron usab mamalit ang mga Filipino sa “Philippine Made” products kinahanglang mohimo og mga programa ug pamaagi ang gobiyerno pagdasig sa publiko, pag-esplikar sa kaayohang makuha sa nasud kung atong produkto maoy atong paliton ug tabangang molambo ang lokal nga produkto.