Daghan kaayong nagmahay sa goberno niining plano na usab nila nga patas-an ang buhis sa sigarilyo ug ilimnong makahubog.
Kay alang gud sa mga hinigarilyo ug palainom, ang mga butang nga makalipay kanila bisan daling makamatay angay naman lang untang iregalo sa goberno kanila.
Miingon sila nga maayo naman lang unta nga inigtaliwan nila sa laing kalibotan gumikan sa pagkahinigarilyo, ug sa pagkapalainom, murag may dyutay nga indulhensya ang goberno kanila .
Apan murag di man mabangbang ang mga magbabalaod kinsa nagpanikad nga patas-an gyud ang sin taxes.
Ambot kun ngano ba sab nga buhis man sa sala ang ilang tawag niini nga unta alang sa nagbisyo sa sigarilyo ug palahubog, di man sala ang pagpanigarilyo ug paglala og bino.
Sa Biblia, gitataw nga angay mahalon sa tawo ang iyang lawas, aron ikalahutay pa kini sa pagpakabuhi nga makaalagad sa Dios nga nagbuhat sa lawas ug naghatag og kinabuhi niini.
Busa tungod kay gipamatud-an man sa mga doktor nga makagusbat sa baga sa tawo ang aso sa sigarilyo ug makaguba sa atay ang bino, makatarunganon lang ang Dios nga maoy naggama sa tawo nga moawhag sa hingtungdan nga mahalon ang iyang lawas.
Di baya malalim kun ikaw nagpanday og usa ka butang aron ihatag nimo sa imong minahal nga anak unya tamhang-tamhangan lang sa imong gihatagan , natural nga magmahay ka.
Sama usab sa Dios nga maoy nagmugna sa lawas sa tawo, sakit alang Kaniya kun ang iyang gihatag nga kinabuhi di ampingan sa nakadawat niini.
Ambot kun unsaon kini pagsabot, kay kun imong sutaon, ikaw pay hikogan, ikaw pay magbayad og mahal sa imong ihikog, pagkapait baya.
Wa kaha ka bugal-bugali niini? Apan kinsa bay mosupak sa balaod bahin sa pamuhis nga gipatuman sa balaod.
Pastilan ka-wa bayay dag-anan sa tawo, kun magpakabuhi dagko og bayran sa buhis, kun magpakamatay pinaagi sa sigarilyo ug bino labaw pa ka dako ang gasto, haayyyyyyyy..pastilan baya ning kinabuhia oi. Di ba?