Bulan sa tingbitay sa iro

Gikatakda na nga ipatuman sa Hulyo 30 niining tuiga ang estrikto nga pagsul-ob og standard protective motorcycle helmets sa matag higayon nga magsakay og motorsiklo ang drayber ug ingon man ang moangkas niini. Dako ang multa sa madakpan sa Land Transportation Office (LTO) personnel ug sa tanan nilang mga deputized agent nga ipakatap sa kadalanan sugod unya niining maong gikatakdang bulan.

Ang magsakay og motorsiklo mapugos gayod sa pagpalit og standard protective helmet nga nagdala sa tatak sa Philippine Standard (PS) o Imported Commodity Clearance (ICC) gikan sa Bureau of Product Standards kon BPS.

Ang Department of Trade and Industry (DTI) maoy gitahasan sa pagtan-aw sa maong matang sa mga helmet ug ang LTO usab maoy gitahasan sa pagpatuman sa maong balaod diha sa kadalanan subay usab sa kamandoan nga giluwatan sa Department of Transportation and Communication (DOTC) nga gipangulohan ni DOTC Secretary Mar Roxas.

Nunot sa nagkaduol na nga bulan alang sa higpit nga pagpatuman sa RA 10054 dili usab kalikayan ang pagbagolbol sa mga tawo nga naapektohan nga naglakip na sa liboan ka mga ordinaryo nga mamumuo nga naggamit sa motorsiklo alang sa matag adlaw nilang pagtambong sa trabaho ug ingon man sa liboan ka mga habal-habal drayber sa Sugbo.

Ang ilang pagbagolbol tungod kay nakita man nila nga mosugot sila o dili mapugos man sila sa pagtuman kay kalapasan man sa balaod ug masugamak na hinuon sila sa pagbayad sa multa nga gikan sa P1,500 ngadto na sa P10, 000 kantidad sa higayon nga madakpan.

Matud pa sa mga nagbagolbol nga mga kabus nga motorista nga giatol man pod sa gobiyerno sa bulan sa tingbitay sa iro ang pagpatuman sa maong balaod.

Kini maoy panultihon sa mga tawo nga makasinati og kalisod sa kahimtang nga naglakip sa pagkawalay kuwarta ug nakasinati usab sa hilabihan kamahal sa mga palaliton sama sa bugas ug uban pa.

Ang bulan sa Hulyo ug Agosto ilang gitawag og bulan nga tingbitay sa iro tungod kay niining panahona mao pa man ang pagpananom alang sa mga mag-uuma ug mao usab ang pag-abli sa klase ug sagad sa kuwarta sa mga tawo atua nila ihapak sa balayranan sa anak nilang nagtungha.

“Kun Disyembre pa hinuon okay ra kay tingdawat man na og bunos ug extra cash gift nga maoy magamit sa pagpalit og helmet,” matud pa sa mga nagbagolbol nga adunay trabaho. (Romeo T. Limpangog)