EDITORYAL - Pari nga Australyano nagminyo og Filipina?

Ang gikompisal sa usa ka pari nga Australyano ngadto sa publiko nga nagminyo siya og usa ka Filipina, di usa ka bag-ong butang.

Kay ang pagminyo usa ka sagradong sugo sa Dios sukad pa sa panahon ni Adan ug Eva.

Gilangkat sa Dios ang walang gusok ni Adan dihang nasud-ong Niya nga nagpunay lang og tikongkong si Adan nga way pares, samtang ang mga mananap nga Iyang gibuhat may baye ug laki.

Busa kun gituyo sa Dios nga buhatan og babaye o asawa ang usa ka lalaki, nagpasabot nga mao kini Iyang kalipay kay gani didto magsukad ang Iyang sugo sa tawo sa pagpasanay niini apan   kun modaghan na, kinahanglang mopreno usab.

Si Kristo gihimugso sa Dios sa sabakan ni Maria, nga wa magminyo may misyon siya nga lahi kang Adan.

Si Adan, gihatagan sa Dios og asawa tungod kay gusto sa Dios nga mosanay ang tawo sa kalibotan pinaagi kanila.

Samtang si Kristo gipakatawo sa Dios kay gitahasan sa pagluwas sa mga tawo nga angay maluwas inigkatapos sa kalibotan.

Ang Iyang misyon sa pagka-manluluwas para ra Kaniya busa kun sundugon Siya nga wa magminyo, tungod ba kay gusto ka usab nga mahimong manluluwas sama kang Kristo? Pagkalayo sa kamatuoran.

Si Kristo bisan tawo Siya lahi og kinaiya kay kanatong mga tawo nga gilalang sa Dios pinaagi sa atong amahan ug inahan kay ganahan kita og sex.

Apan si Kristo wa hatagi sa Dios og sama sa atong kinaiya aron nga walay ikasaway ang tawo sa Iyang pagkamanluluwas.

Kun sundogon Siya sa tawong sama kanato, igo ka lamang sa pagpakasala tungod kay ang tawo, gipakatawo nga kaantigo mangibog ug ang pagpugong sa kaugalingon nga di magminyo igo ka lang nagbanlod sa imong kaugalingon sa kadako sa imong sala kay bisan og unsaon nimo pagtago ang imong sekreto mogawas gayud ang tinuod sama sa aso nga di makumkom.

Busa dalaygon ang pari nga Australyano nga mitug-an sa kamatuoran kay sa ubang sama kaniya nga nagpakahilom lang unya madiskobrehan nalang nga daghan kaayong lampin sa bata ang kombento nga iyang gipuy-an. Di ba?