Kagaw's politika

Ang katabang kon suluguon, sinuholan kini sila sa ilang agalon tugbang sa ilang pag-alagad. Apan kun ikaw mahimong suluguon diha sa usa ka lungsod, sa barangay o sa dakbayan nag-alagad ka’s imong katawhan diha sa imong lugar o dapit nga gialagaran isip serbisyo publiko sa imong mga konstituwente.

Sa ato pa, usa ikaw ka politiko ug kining pagkahilambigit mo sa politika, bunga ug tipik kining tanan sa kagaw sa politikanhong dynastiya’ng nasunod mo gikan sa imong mga ginikanan, o kagikan diha sa inyong dapit, ug bisa’g asa ka pa mao na gyud kini imong himat-an ug imong hikatulgan.

Diha sa politika, bisa’g asa kasagaran gyud magpulipuli diha sa ilang gahum ang amahan, anak o asawa sa maong dynastiya’ng politikanhon ug hinungdan nga adunay mga pangurakot diha sa palibot sa maong kagamhanan. Tungod niini dili na sila gustong anaa pay laing tawo nga makahupot pa sa ilang gahum, tungod sa kagaw sa politika, kay ang politiko, wala’y permanenteng higala, kay ang suod mong higala karon, maoy mapintas mong kaaway’s umaabot.

Hala bomba Nyor, mao kini kasagarang madungog ta diha sa mga basal bolero ug sa mga torotot sa mga politiko karon nga namalit na’g mga horas sa radyo ug sa telebisyon, pamugas pugas na kini sa umaabot eleksiyon 2013, kay lagi human unya sa ilang tagsatagsa ka termino, dili kini sila magpapire ug magpapuli na sab ug laing katungdanan bisa’g asa, aron sa katagbawan sa kalami ning kagaw’s politika.