EDITORYAL - Smoking area sa matag opisina sa gobiyerno

Higpit nang gipatuman karon sa Civil Service Commission (CSC) ang balaod bahin sa pagbutang og smoking area sa matag buhatan sa kagamhanan.

Kini agi og respeto sa kagamhanan ngadto sa manigarilyo nga kawani niini.

Bisan nasayud ang kagamhanan nga ang second hand smoke peligro kaayo ug labaw sa tanan niadtong kawani niini nga manigarilyo, apan sa gihapon wala idili niini sa iyang mga trabahante ang sigarilyo.

Gani sa mga sudlanan o kaha sa sigarilyo, igo rang gipahibawo sa goberno nga ang pagpanigarilyo peligro sa lawas sa tawo.

Wa sumpayi niini nga kun manigarilyo ka, imo na kanang risgo ug sa mga sakop sa imong panimalay sama sa imong asawa ug mga anak tungod kay sila ang direktamenteng mosuyop sa aso sa kamatayon.

Buot lang ipasabot nga sa usa ka tawong hinigarilyo, di lamang ang iyang kaugalingon ang buot niyang hikogan kundi, lakip ang iyang asawa ug mga anak ug tanang sakop sa iyang panimalay.

Busa ang asawa ug mga anak nga di pa gustong mamatay gumikan sa bisyo sa bana nga panigarilyo, may katungod nga mobadlong sa hingtungdan.

Kun luyo sa maong pagbadlong di mopatuo, usa lang ang tinguha niini nga sa iyang paghilo sa iyang kaugalingon anginon niya ang iyang mga minahal sa kinabuhi.

Sama ra usab sa usa ka buhatan sa gobiyerno nga, kun pagahinan sa kagamhanan og lugar nga pabulhotan og sigarilyo sa mga trabahante niining hinigarilyo, kini tungod kay gusto sa kagamhanan nga di mabiktima sa second hand smoke ang ubang mga kawani nga di mosuyop og aso sa sigarilyo.

Busa ang usa ka opisina sa goberno nga di mogama og smoking area sa hinigarilyo niining trabahante, nagpasabot lang nga wa kini maghunahuna sa safety sa kinabuhi sa mga di hinigarilyo sa maong opisina ug angay kining imbistigahon sa CSC. Di ba?