EDITORYA - Ang US di motabang sa Pilipinas?

Kun si Senador Miriam Santiago misulti sa tinuod nga ang US di mag-apil-apil ning bangi sa Pilipinas batok sa China, puwerting luoya sa Pilipinas.

Ang giawhag ni Santiago nga manangpit nalang ang Pilipinas sa kaubang mga nasud nga sakop    sa ASEAN kinsa nangangkon usab og mga isla sa Spratly, salikwaot kaayo kining mahitabo.

Kay utro usab kanang mga nasura, sama sa Indonesia, Malaysia,   Brunei ug uban pang sakop sa ASEAN nga may mga isla sa Spratly , nga naglikay gani sa pagsuway og pupasiyo sa ilang mga barko didto sa Spratly kay sa siga pa lang sa mga mata sa mga Insek, tua motibi na.

Ang kinaisugang nasud nga misungasong gyud bisan giunsa og siga-siga sa mata sa mga Insek, ang mga Pilipino ra nga mga sundawo.

Bisan og mibahag ang ikog niini, apan miarangkada gyud, misuway man gani sa pagsulod didto sa Scarborough Shoal, bisan kun gi-ibid-ibiran usab sa mga barko sa China.

Ang kahimtang diay karon sa unom ka barko sa Pilipinas nga tua sa Scarborough Shoal, sama sa player sa basketball nga maoy nagdala sa bola nga, gi-man to man pagguwardiya sa kontra aron di gyud maka-shot sa bola ngadto sa ring.

Apan maayo to kay basketball man, kining kasoha karon kay nangugat gyud og binantayay ang Pilipinas sa Scarborough Shoal kay lagi ato kini, apan kun ugaling may katigayonan nga maani ang Pilipinas gikan sa maong lugar, ang pangutana makuha kaha kini ug maangkon nato  sa sayon nga paagi?

Inigsuway palang sa atong mga sundawo og tugsaw sa dagat aron mokuha sa maong bahandi sama sa lana ilawom sa maong takot nga ginganlan og Scarborough Shoal o kaha sa mga isla didto sa Spratly, di kaha gubhan ug kupogan  dayon kini sa mga sundawo sa China?

Unya unsa may buot ipasabot ni Santiago nga di motabang ang US sa Pilipinas niining kasoha?Tungod ba kay nahadlok ang Amerika nga hasta sila kupogan sa China? Pero ang labing maayo sutaon unta kini ni P-Noy unsay baruganan sa US niining kasoha. Di ba?