Mingaw pa's tirana
Ugma Labor day apan puno sa kalaay ug way kadasig ang mga mamumuo nga mosaulog niini tungod kay siguradong way maayong balita nga mapaabot gikan sa atong gobyerno.
Way kahinam diha sa tagsa tagsa ka mga kasingkasing sa mga trabahante tungod kay sayod silang daan way umento sa sweldo nga ilang mapaabot.
Duha ka mga dagko nga kapunongan sa mga mamumuo dinhi sa Central Visayas ang misang-at na og petisyon atubangan sa Regional Tripartite Wages and Productivity Board aron pagpangayo og usbaw sa inadlaw nga suholan.
Apan hangtud ron wala pa ni matuki tungod kay ubos sa balaud kinahanglan nga moabot usa og usa ka tuig sukad mipagawas og wage order ang RTWPB sa dili pa sila makahimo pagtuki og laing petisyon gawas lang kun dunay supervening condition.
Ang supervening condition mao ang panghitabo sama sa grabing pagsaka sa presyo sa palaliton, gasolina ug uban pa nga direktang makaapekto sa kita sa mga trabahante.
Kinahanglang ideklarar sa mga sakop sa board ang presensiya sa maong condition aron sila makasugod pagtagad sa nag-ung-ong nga wage petition.
Ang board misugod na sa miaging semana og hisgot kun duna bay supervening condition apan sama sa nangagi wala silay desisyon nga nakab-ot. Mipatigbabaw gihapon ang diktar sa mga negosyante sa RTWPB paglangaylangay sa proseso.
Unsaon nga ang atong mga representante sa gobyerno diha sa board klaro man kaayo nga tua kapusta sa mga kapitalista.
Sa daghang mga higayon ang mga government sector representatives diha sa RTWPB nakig-alyansa sa mga representante sa management hinungdan nga wala gyud intawoy dag-anan ang duha ka representante sa mga mamumuo.
Mao nga mosugot ta og dili mingaw pa sa tirana ang atong pagsugat sa Labor day ugmang adlawa.
* * *
- Latest
- Trending
