Walay pagtaas sa suholan

Sa makausa pa, magsaulog na usab ang mga mamumuo dinhi sa nasud sa Labor Day ugmang adlawa. Dako kini nga selebrasyon gumikan kay gitumong man kini paghatag og dakong pasidungog ngadto sa mga nagpatulo sa ilang singot aron adunay makaon ang ilang mga pamilya.

Apan unsa kaha ang ilang mapaabot nga kaayohan gikan sa gobiyerno niining maong kasaulogan. Aduna kahay saad nga ibungat ang kagamhanan aron pag-isa sa ilang nag-ilaid nga kahimtang karon?   

Ato lamang nga atangan kun unsa ang anunsiyo ni Presidente Benigno Aquino ugma alang sa mga mamumuo. Naandan na nga ang presidente adunay mensahi ngadto sa mga trabahor atol sa selebrasyon sa Labor Day.

Apan morag dili maayo ang selebrasyon sa Labor Day sa mga trabahador dinhi sa Central Visayas. Kini sa dihang wala tugoti sa Regional Tripartite Wages and Productivity Board-7 ang mga lakang pagtaas sa suholan sa mga mamumuo sa rehiyon.

Dili obligado ang maong wage board nga motugot og dugang pagtaas sa suholan sa mga trabahador sa Central Visayas karong panahona. Gidid-an kini sa balaod nga makataas sa suholan tungod kay wala pa may usa ka tuig gikan sa naulahing pagtaas sa suweldo sa mga mamumuo sa rehiyon.

Hinuon makahimo kining makaisa sa suholan kun adunay mga supervening conditions. Gitugot kini sa balaud. Kini bisan pa man sa usa ka tuig nga ban sa wage hike gikan sa labing ulahing pagtaas sa suholan.   

Atol sa meeting niadtong Huwebes, wala kunoy nakit-an ang wage board og mga supervening conditions sa kahimtang karon nga makahatag og pagtaas sa suholan sa mga mamumuo.

Dili kuno rason ang mga pagtaas sa presyo sa mga nag-unang palaliton nga makapugos sa kagamhanan pag-implementar og dugang pagtaas sa suholan sa mga trabahador dinhi sa rehiyon.

Kini nagpasabot lamang nga dulom pa sa alkitran ang kasiguroan nga maangkon sa mga mamumuo ang pagtaas sa ilang inadlaw’ng suholan niining panahona. Ug klarong masulob-on gayud sila niining kasaulogan sa Labor Day.

Apan hinaut nga makahunahuna ang kagamhanan pagtan-aw sa kalisod sa kahimtang sa mga mamumuo ug mohatag kini bisan gamay nga pahalipay ngadto sa mga trabahador niining kasaulogan sa Labor Day.