Dunay usa ka inahan nga miduol nako ug mireklamo sa sistema sa City Hall kun ngano nga pagbut-an man ang usa ka scholar sa dakbayan kun unsa ang kurso nga kuhaon sa bata.
Nasayud man gud ang maong inahan nga reporter ko sa The Freeman nga nadistino sa City Hall. Matud sa inahan “Naunsa na man kining administrasyon ni (Mayor Michael) Rama, bati na man kaayo ang scholarship.”
Akong gipasabot ang maong inahan nga tukma ra man usab ang gihimo sa mga opisyal sa City Hall. Kining sistima nga dili tugotan sa City Hall ang usa ka bata nga mokuha og mga lisud nga kurso kun hinay siya’g “IQ” gisugdan dihang si Vice Mayor Joy Young mao pa ang nagdumala sa scholarship program.
Suheto ko niini kay ang akong anak usa sa mga pioneer scholars sa dakbayan. Atol sa ilang batch, kapin sa 5,000 sila nga mi-avail sa scholarship grant sa City Hall. Wala sila did-i pagpili bisan unsay gusto nila nga kurso.
Gitug-anan ko sa akong anak nga sa ilang kurso nga Architecture, nag-anam sila og kagamay. Dunay uban nga wala mohuman sa semester, samtang ang uban nakahuman tuod apan wala na mopadayon sa kurso pagka second semester.
Dunay uban nga mibalhin og tunghaan kay samtang pareho ra og kurso apan sayon kuno ang leksyon nga gihatag kanila. Ingon usab niini ang sitwasyon niadtong mga mikuha og kurso nga Engineering, daghang wala makatiwas.Nakahukom ang City Hall nga mohimo og psychometric test ngadto sa mga mo-apply og scholarship sa dakbayan aron pagsuta sa ilang abilidad.
Basi sa labing ulahi nga resulta sa mga migradwar sa public high schools adtong Marso, katunga ang dili haum mokuha og lisud nga mga kurso. Kun papadayonon nato ang maong mga tinun-an sa pagkuha og kurso nga lisud kaayo nila masabtan, mausik ra ang gigasto sa dakbayan. Pananglit mogradwar usab sila sa maong kurso, basin og walay modawat kanila og trabaho kay dili man makamao.
* * *
Wala’y mapaabot nga usbaw sa sweldo ang mga trabahador atul sa pagsaulog nato sa Mayo 1. Sagdi lang gud og walay usbaw sa atong sweldo, doblehon lang nato ang atong paningkamot.
Kun motrabaho ta og tulo, “bawot-bawot” ra ang sweldo nato og manager, apan kapoy lang lagi. Kadtong mga ligoy nga sayo matulog ug dugay momata sa buntag dili gayud magsilbi.
Agwantahon lang nato nga walay usbaw sa sweldo kay sigurado ko nga kun adunay usbaw, daghan ang manirado nga kompaniya o kaha manaktak og mga kawani aron makasustiner.
* * *
Putlon kuno sa dakbayan ang kontrata niini ngadto sa Innove Communications nga karon Globelines na tungod sa bati nga serbisyo. Sigi putla, walay problema. Ang-ang og papadayonon sila nga bati man ang ilang serbisyo. Ang mga traffic signal lights diha sa atong mga eskena halos katunga niini gigamitan sa linya sa Globelines. Matud ni CITOM executive officer Raphael Christopher Yap nga kun maguba ang ilang linya pwerteng dugaya sa Globelines moayo.
Alang nako, maayo nga ilisan sa dakbayan ang ilang service provider. Husto sila sa bayad gikan sa dakbayan unya walay maayong serbisyo? Alkanseha nato no?
Tungod sa wala nila dayon pag-ayo sa mga guba sa ilang linya, nagkaguliyang ang trapiko sa daghang mga eskena.