Sukad sa akong pagkahagbong sa College of Law sa University of San Carlos, wa na gyud ming magkita ni magkasulti ni Atty. Roberto Palmares, usa sa akong mga magtutudlo. Maong nakugang ko pagkadawat og text message samtang nagduma sa Arangkada sa DYAB Abante Pa, Bisaya! nga nagpahibawo nga ganahang makigsulti si Palmares nako.
Kay di man kong katubag niya off the air, gisibya nako ang landlines sa among sibyaanan. Human sa pila ka gutlo, gipahibawo ko sa among news director nga si June Perez nga naa na sa linya sa telepono si Palmares. Pagsugod namo’g istorya, gipahibawo nako si Palmares nga on the air siya. Wa siya motukol. May mahinungdanon diay siyang pahibawo.
* * *
Si Palmares maoy abogado ni Mariano Godinez, ang nangangkon nga tag-iya sa luna sa San Miguel, Apas, Cebu City nga gipuy-an sa 168 ka pamilya nga gimandoan na sa korte nga papahawaon. Giingnan ko niya nga duna siyay bag-ong tanyag ngadto sa mga molupyo aron kalikayan ang bisan unsang kaguliyang sa nag-ung-ong nga demolisyon:
• Mohatag siya og P17 milyones nga financial assistance ngadto sa mga molupyo aron nga mas sayon nga makapangita og bag-ong mga pinuy-anan;
• Unya na hinuon ihatag ang hinabang kun mahalin na ang luna, sa kasamtangan gihangyo niyang Cebu City government nga mao unay mo-abante sa kuwarta; ug
• Mopahuwam siya og mga sakyanan aron katabangan ang mga molupyo paghakot sa ilang kabtangan ngadto sa ilang balhinan.
* * *
Nakugang sab sa tanyag ni Palmares ang presidente sa Archangels Residents Mergence Inc. (Armi), si Ignacio Labro. Sukwahi sa ilang pagsalikway dayon sa nahaunang tanyag ni Palmares sa niaging semana paghatag nila og unom ka buwan nga lugway sa pagpangita og relocation site, silang Labro ug kaubanan nagtigom una aron pagtuki sa tanyag.
Kun dawaton sa mga molupyo, ang matag pamilya makadawat og kapin sa P100,000. Matud ni Palmares mas dako ang aktuwal nga madawat kay wa rang kaabot og 100 ka pamilya ang nipirma sa petisyon pagkuwestiyon sa pagpanag-iya ni Godinez sa luna.
* * *
Sa akong pagsuwat ini, pipila ka sakop sa Armi nisupak na sa tanyag ni Palmares. Gihulagway nila ang P17 milyones nga gamay ra. Tungod sa kamadanihon sa nahimutangan sa 4.7 ka ektarya nga luna, nga masumpay sa malambuon nga IT Park, sayon kaayong mahalin og P1 bilyon sa nag-ilog nga higanteng developers.
Kun pun-an nilang Palmares ug Godinez ang tanyag ug makumbinser ang mga molupyo, wa nay awayan silang Mayor Mike Rama ug Kongresista Tommy Osmeña. Di na sab problema ang pagpangita og relocation site. Kay may andam nang kuwarta nga ikapalit og mas dakong luna. Kun di man mag-iyahay ang mga molupyo pagpangita og kabalhinan.
* * *
Email: leo_lastimosa@abs-cbn.com.