Maglisud sa pangihi

May higayon nga dili kita kaalinggat nga dili na maayo ang atong pagpangihi. Panagsa na lang hangtud maglisud na kita nga mangihi. Usa lagi sa hinungdan niini, kanang sige’g pugong-pugong basta maagwanta pa, hala pugngan gyud.

Hangtud magsakit ang kinatawo nga kanunay kaihion apan diotay ray mogawas. Tilimad-on kini nga padung sa kadaut ang imong kidney. Posible nihubag o nabara ang agianan sa ihi gumikan sa daghang linugdan nga morag pinong bas puti sa pantog. May purohan nga na-impeksyon na ang kidney mo.

Duna kitay mga natural nga remedyo niani. Daghan na sad ang niprobar nga makaalibyo kini. Obserbahi lang sud 3 ka adlaw kun hain ning paagiha ang mas mi-epekto o nakapaalibyo sa masakiton. Mao kini ang mga mosunod……

*BUHOK SA MAIS – Pagkuhag 1 ka hakop niini ug ilunod sa nagbukal nga tubig ( 1 ka baso ) sud sa 15 minutos. Pabugnawa ug salaa sa limpyong gasa o panapton. Imna sa dili pa mokaon o moisnaks.

*GUWANG NGA ANAGON – Kuhai sa pakpak ang  3 ka buok nga anagon, kanang guwang na apan green pa tan-awon ang pakpak. Unya ilunod apil ang buhok og pabukala ( 1½ ka litro ) sud sa 30 minutos. Sama sa itaas pag-inom.

*DAHON SA BANABA – Pagkuhag 7 ka tagak nga dahong pula o yellow. Pabukala kini ( 1 og ½ ka litro) sud sa 30 minutos. Pabugnawa ug salaa. Bahina nga mahurot sa 1 ka adlaw. Imna sa di pa mokaon ug moisnaks.

*Kun wa gyuy nialibyo, basig unsa na na…iadto na lang na sa doktor.