Misakay sa credit card

Maayong Miyerkules sa tanang suki sa Legal Corner. Ang pangutana nga atong tubagon karon may kalabutan gihapon sa utang sa credit card nga una na natong gihisgutan niadtong Domingo. Ang uban man gud nga mga credit card holders mopagamit niini sa ilang mga higala ug paryente unya kun di sila kabayran anha na motumaw ang problema.

Dear Atty. Divine,

Magpatabang unta ko nimo kay ang akong ig-agaw misakay sa akong credit card. Kun mag-grocery sila or magpagasolina ang akong credit card ang ilang gamiton ug misugot ra sad ko kay mobayad man siya nako matag buwan. Niadtong miaging tuig mikuha siya og computer ug ang akong credit card ang gigamit sa pagbayad niini. Sa unang tulo ka buwan nagsige pa siya nako og bayad sa monthly due apan human niini wa na gyud siya mobayad ug karon gipadad-an na ko og demand letter sa bangko nga miabot na og kapin sa P100,000.00 ang akong utang apil na ang interest. Kanunay nako siyang paninglan apan igo lang siya moingon nga wa pa siyay kwarta. Ang problema atty kay wala mi pinirmahan but she know man kun unsa ilang gipangkuha. Unsa may akong buhaton niini aron mapugos siya sa pagbayad? — Merly 

Dear Merly,

Salamat sa pag-email sa Legal Corner.Mao gyud ni problema sa utang ilabi na sa credit card ug sa mga lending company kay paspas ang pagsaka sa imong bayranan tungod sa interest sa matag higayon nga mapakyas ka sa pagbayad. Kanang utang nga way pinirmahan ug collateral, pagsalig ra gyud sa tawong nangutang ang atong saligan niana. Ang imong buhaton karon kun di gyud siya mobayad sa iyang dakong obligasyon diha nimo mao ang pagpasaka niini og reklamo batok kaniya ngadto sa iyang barangay aron siya ipatawag ug kamo mag-atubang ug sulbaron ang maong problema. Mamahimo sab unta ka nga mopasaka og kaso for collection of money batok sa imong ig-agaw apan ang problema kay wa man moy pinirmahan nga siya utangan nimo sa maong kantidad so mas dali alang kaniya ang pag- deny kun magkalisud. Mas maayo nga aregluhon nalang ninyo ang problema ug hangyoa lang ang imong ig-agaw sa pagbayad niini matag buwan aron dili mosamot pagdako ang interest sa imong utang. Kun di gyud siya mobayad kuhaa ang computer ug ibaligya aron maoy ibayad sa iyang utang diha nimo. Hinaut nga natubag nako ang imong pangutana. — Atty. Divine

Magsilbi unta ni nga leksyon sa uban. Kun magpa-utang gani mo, importante gyud nga aduna moy pinirmahan ilabi na kun adunay interest matag buwan kinahanglan gyud nga isuwat kun pilay interest ug papirmahon ang nangutang sumala pa sa nalatid sa atong balaod. Kun ikaw sab ang nangutang unya mobayad ka sa utang kinahanglan sab nga mangayo ka og acknowledgment receipt sa imong giutangan nga iyang nadawat ang bayad aron di siya maka-deny ug aduna kay ebidensya kun di siya moangkon nga imo na siyang nabayran. LEGAL CORNER, Atty. Divine Marcial-Flores c/o Banat News, corner D. Jakosalem and V. Gullas Sts., Brgy. Sto. Niño, 6000 Cebu City or email sa [email protected]