EDITORIAL - Suliran sa shabu way solusyon

Lisud na masulbad ang suliran bahin sa shabu dinhi sa Sugbo ug angay kining hinuktokan sa tanan di lamang sa mga otoridad sa balaod kundi sa mga molupyo kinsa maoy direktang apektahan ning tanan.

Gikonpirmar kini sa mga jail guard sa Cebu City Jail kinsa nagkanayon nga daghan kaayo og mga paagi ang mga piniriso aron makalusot ngadto sud sa prisohan ang shabu ug uban pang matang sa gidiling drugas.

Ang kapolisan kutob sa ilang maabot igo lang sa pagsulbad sa suliran nga mugna sa mga sibilyan, busa kun may mga polis nga mag-apil-apil sa pagpakusog ning maong matang sa dangan sa katilingban mao kanay angay lunggoan sa liog pinaagi sa pagpapha gikan sa katungdanan.

Kay sa pagkatinuod way laing magsagubang sa dautang epekto ning gidiling drugas kundi ang katawhan.

Gumikan sa gidiling drugas, wa nay kahadlok ang mga kriminal sa pagpatay sa ilang isigkatawo, panlugos, panulis,pangawat, pangilad, ug tanang matang sa krimen mabuhat sa tawong mahubog sa gidiling drugas.

Gumikan sa kalig-on sa tinubdan sa illegal drugs, di mapugngan ang kusog nga pagkuyanap niini bisan hangtud sa kinasuokang bahin ning siyudad ug uban pang lugar   sa lalawigan ug sa tibuok nasud.

Wa baya’y laing gisaligan ang katawhan nga moalkontra ning bisyoha gawas sa mga otoridad sa balaod.

Busa kun may mga tinugyanan sa balaod nga motabang sa pagnegosyo niini pinaagi sa pakigkunsabo sa mga tigpayuhot og shabu ug uban pang matang sa gidili nga drugas, angay silang pahamtangan og bug-at nga silot.

Kun ugaling moburot sila sa kakuwartahan pinaagi sa maong negosyo nga di hisakpan sa ilang kaubanan angay iampo nga maoy unang gabaan.

Kay kinsa pa may masangpit sa katawhan kun ang   kapolisan nga gipiyalan sa pagsanta niini maoy mounay sa pagsurambaw sa publiko. Di ba?