Asa nagluk-lok si Ecleo?

Human sa iyang pagkakonbikto sa kasong pagpatay sa iyang asawa napulo na ka tuig ang nakalabay, dakong tahas karon sa otoridad ang pag-aresto kang Dinagat Representative Ruben Ecleo. 

Asa na kaha karon nagluklok ang pangulo sa Philippine Benevolent Missionaries Association? Kana maoy dakong pangutana nga kinahanglang tutukan sa otoridad alang sa dinaliang pagkasikop niini. Nagduda ko’ng tua ra siya nagtago sa iyang palasyo didto sa isla sa Dinagat. Isip main base sa PBMA, dili layo ang posibilidad nga tua ra didto nagtago si Ecleo. Hinuon dili lamang ako ang nangagpas niini.

Ug kun wala man ugaling didto si Ecleo sa iyang gingharian sa Dinagat, dako usab ang posibilidad nga atua siya nagtago sa panimalay sa mga sakop sa PBMA. Kini tungod kay klarong tabangan gayud siya sa iyang mga alipures niining iyang pagtago-tago gikan sa balaud.  

Dili ikalimod nga puwerte ka daghan ang mga sumusunod ni Ecleo. Basi sa rekord, mokabat kuno ngadto sa usa ka milyon ang sakop sa PBMA. Sila mikuyanap na dili lamang sa Pilipinas kondili ngadto usab sa ubang kanasuran.

Karon, isip divine master sa PBMA, makasiguro gayud kita nga sapwangon si Ecleo sa mga kamot sa iyang mga sumusunod. Daghan sa iyang mga sakop ang mga adunahan ug nga andam gayud nga moprotehir kaniya.

Dako gayud ang posibilidad nga adto mopasilong ang hari sa PBMA sa iyang mga sakop. Ug kini ang maghatag unya og labad sa ulo sa kapolisan tungod kay maglisod unya sila sa ilang operasyon batok sa divine master.

Daan nga giadmiter sa director general sa Philippine National Police nga si Nicanor Bartolome nga maglisod gayod sila pagdakop kang Ecleo. Apan iyang gipasalig nga pinaagi sa maayong intelligence work ug kooperasyon gikan sa komunidad, kumpiyansa siyang masikop ra gayud si Ecleo.

Kun asa man magluklok karon si Ecleo, siguradong dili gayud kini mosurender sa kapolisan. Kahinumdoman nga nahanaw na lamang siya human mipagawas og arrest warrant ang Sandiganbayan batok kaniya tungod sa kasong graft nga iyang gisagubang.

Angay lamang nga hingusgan sa otoridad ang ilang kampanya batok sa kongresista. Kinahanglan nga ila gayud nga ipakita nga dili gayud makalusot si Ecleo gikan sa mga kamot sa balaud.