Job fair ug medical mission sa lungsod sa Minglanilla

Giisip nga labing dako nga job fair, feeding program ug medical mission sa lungsod sa Minglanilla nga gikatakdang pagahimoon karong Mayo 22 niining tuiga.

Daghan ang nag-ingon nga ang mga job fair nga pasiugdahan dako og ikatabang sa mga tawo nga walay trabaho ug ang medical mission makatabang usab sa mga kabus nga walay salapi nga magamit alang sa pagpa-check up og doktor sa kahimtang sa ilang panglawas.

Nunot niini si Kapitan Antero Cana Jr. sa barangay Ward 4 sa lungsod sa Minglanilla miingon nga ang job fair nanginahanglan og kapin sa 3,000 ka mga aplikante sa security guard nga mga lalaki, 5,000 ka mga domestic helper, ug liboan ka mga panday, mason, housekeeping personnel, swimming pool care takers , beautician, waitress, waiters ug uban pa.

Matud pa ni Kapitan Cana nga gitakdang pagahimoon karong Mayo 22 niining tuiga ug ang hiring sa maong job fair dili lamang anhi motrabaho sa Sugbo kun dili adto na kini sa gawas sa nasud.

Dugang pa ni Kapitan Cana nga dugang sa maong adlaw nga kalihokan mao ang pagpasiugda usab og feeding program nga maoy makapahimulos og medical mission.

Gitataw niya nga ang medical mission nga pagahimoon usab sa maong adlaw ilang gipaabot nga magdasok sa pagpahimulos sa medical mission nga ilang pagahimoon. Si Kapitan Cana miingon nga alang niadtong mga nagtinguha sa pag-apil sa mga kalihokan sa maong adlaw mao kadtong mga tawo nga molupyo sa Minglanilla nga nagtinguha usab pagpa-check up sa kahimtang sa ilang panglawas.

Hinuon mag-una ang local job fair nga adto pagahimoon sa Cebu International Convention Center sa reclamation area sa dakbayan sa Mandaue sanglit sa Mayo 1 man ang pagpahigayon niini. Ang kagamhanan sa lalawigan sa Sugbo pinaagi sa Cebu Public Employment Office (PESO) maoy nagpasiugda sa maong job fair nga gipahaum usab sa kasaulogan sa Labor Day karong tuiga. (Romeo T. Limpangog)