Ang akong informer diha sa Cebu City Jail sa Barangay Kalunasan, usa ka “very reliable source” mikonpirmar nga wala gayud masumpo ang pagpamaligya og illegal nga drugas nga shabu sulod sa bilanggoan.
Kini maoy angay nga tutokan pag-ayo sa kapolisan nga ilang imbistigahon kay ang akong informer mitug-an kanako nga may kalambigitan sa illegal nga drugas ang pagpatay ni Tony Santos.
Dili lang nako idetalyi pag-ayo ang akong nahibaw-an apan angay’ng sutaon sa mga imbistigador kun nganong si Tony Santos sa wala pa patya nagbalik-balik man sa City Jail aron bisitahan si Ariel “Bobong” Degamo.Sa wala pa mabulgar sa media ang pagpusil-patay ni Tony Santos, ang akong inpormer sa Cebu City jail mitawag na kanako og mipahibalo nga gipatay ang biktima gikan nga mobisita unta ni Degamo kaniadtong Miyerkules.
Si Tony Santos mibisita ni Degamo sa City Jail adtong Domingo, mibalik pagka Martes, ug misuway unta pagbisita sa mao gihapon nga priso pagka Miyerkules.
Wala pasudla si Tony kaniadtong Miyerkules kay dili man adlaw sa dalaw kon pagbisita sa mga priso. Sa imong pagtimbang-timbang, ngano kaha nga nagsigi man siya og balik-balik sa City Jail?
Si Degamo sigun sa atong nahibaw-an suspetsado kini sa kaso nga frustrated murder nga didto mahitabo sa Mindanao. Ang akong inpormer mitug-an nga kini si Degamo “assistant commander” sa mga piniriso.
* * *
Naminaw ko sa report sa radyo diin gikutlo sa reporter ang pamahayag sa polis nga nag-imbistigar sa pagpusil-patay ni Tony Santos nga lisud kuno ilhon kinsa kadtong tawo nga mikontak sa biktima sa wala pa siya patya.
Sa wala pa gud patya si Tony didto sa hilit nga dapit sa Barangay Kalunasan gikan nga miadto sa Cebu City jail kaniadtong Miyerkules sa udto, dunay mi-text niya kaduha nga nag-awhag niya nga “Tawag na.”
Human mitawag si Tony sa maong numero, may text na usab nga gikan gihapon sa susama nga numero nga nag-awhag kaniya nga “Tawag Usab.” Gusto unta sa kapolisan nga ilhon kun kinsa ang maong tawo.
Matud sa kapolisan nga lisud ang pag-ila niini kay ang pagbaligya sa pre-paid cards wala may control, bisan kinsa ra ang makapalit nga dili irehestro. Ang akong sugyot sa mga imbistigador niining maong kaso nga ipublikar ninyo sa mantalaan ug tug-ani ang media kun unsa ang maong numero kay pinaagi niini, mahimong ang kontak sa maong tawo makatabang pag-ila sa maong tawo.
Sagad nato daghan kaayo og kontak. Mahimo nga ang mga tawo nga kontak o kaila sa mipadala og text message ni Tony Santos, kadtong miingon “Tawag na! ug Tawag Usab” mohatag og inpormasyon sa mga polis.
* * *
Balik ta sa City Jail. Ang mga mobisita sa mga priso gidid-an nga mopasulod og mga talinggab nga butang ngadto sa prisohan apil na gani ang ball pen. Apil nga gidili ang sigarilyo. Anha pa lang sa ganghaan sa prisohan sakmiton na, apan nganong kun adto ka mopalit sa sulod itugot ra man? Dili ba kataw-anan? Unsay pagsabot nimo higala? Dili ba duna’y negosyo sa ballpen ug sigarilyo diha sa prisohan? Apil nga ginegosyo nga daku og ganansya ang cellphone.
Usbon nako, salamat kaayo nga adunay “insider” sa prisohan nga maghatagan kanako og inpormasyon para mahibaw-an ang binuang. Nahinumdom mo adtong mga dalaw nga babaye nga panglilion sa mga gwardya nga lalaki sa una nga ako gihapon ang nakadiskobre pinaagi sa akong inpormer?