Ang pagsaka sa populasyon sa nasud di na kapugngan tungod kay kagustohan kini sa tawo.
Sa pagkakaron anaa na sa 93 milyones ang populasyon sa nasud, misaka ang bayranan sa eskuylahan ug misaka usab ang tuig una molampos og kurso ang usa ka estudyante.
Gani karon nga anaa pa sa naandang gidugayon sa tuig sa paglampos ang usa ka estudyante agad sa kurso nga iyang kuhaon, daghan man ang di makagraduwar gumikan sa kalisud, unsa na kaha niining gisugdan karong programa nga magdugang sa mga tuig una mograduwar ang estudyante.
Sa bag-ong sistema nga gisugdan na sa pagpatuman sa kagamhanan , murag napanglantawan nga daghan na ang mga estudyante nga di makalampos sa pagtuon tungod sa kaapiki sa panginabuhi
Kadtong giingon nila nga dinhi ning bag-ong sistema , maka-apply dayon og trabaho ang bisan igo lang mograduwar sa high school, lisud kaayong tuohan kay sumala sa atong nasaksihan, estrikto kaayo ang mga trabahoan sa pagpanawat og mga aplikante sa trabaho.
Ang una nilang pangitaon mao ang papeles nga magmatuod nga gradwado ang aplikante sa usa ka kurso
Kun walay ikapakita, dili usab mangahas ang usa ka kompaniya sa pagdawat sa aplikante nga wa makagraduwar og kurso .
Busa sa mga kabus nga wa nay ikasarang sa paglampos og kurso tungod sa kaapiki sa ikagasto, mura'g lisud kaayo pagkaplag og trabaho. Kun ang magtiayon nga may duha lang ka anak , maglisud sa pagpalampos sa ilang mga anak, unsa na kaha ang manganak og lima ka buok.
Mao nga di sayop sa kagamhanan ang paggiya sa usa ka magtiayon nga maghinay-hinay sa pagpanganak tungod kay nasayran nang daan nga ang pagpadaghan sa anak labing makapahimong makaluluoy sa nahisgotang mga anak kay wa may ikaabot ang ginikanan sa pagpatungha kaniya sa eskuylahan aron makalampos og kurso. Di ba?