Ipadisbar ni Kongresista Tomas Osmeña si Konsehal Edgardo Labella tungod kay nanglingla kini sa mga nanimuyo sa Sitio San Miguel, Apas nga apektado sa demolisyon.
Ang kongresista namasangil nila ni Mayor Michael Rama ug Konsehal Edgardo Labella nga nangilad tungod kay ang abogado sa tag-iya sa yuta nga maoy nagpapahawa sa mga residente kauban ra sa konsehal sa iyang opisina. Gipasanginlan usab sa kongresista ang mayor ug ang konsehal nga nag fund raising alang sa kandidatura sa pagka bise mayor ni Konsehal Edgardo Labella.
Gusto lamang kunong mang komisyon ang duha sa luna nga gipanag-iya sa mga Godinez nga mokantidad na og bilyones ka pesos. Apan gipanghimakak ni Konsehal Labella ang mga pasangil sa kongresista. Ang mayor mipina usab sa kongresista nga maghinay-hinay sa iyang ipanulti.
Ang mayor miingon nga kun pasakaan sa kongresista og disbarment si Konsehal Edgardo Labella iya usab nga pasakaan og kasong libelo ang kongresista. Mao na ni ron ina kay magtinabangay para sa kasulbaran sa suliran sa mga residente nga demolisonon nanggiaway na hinoon. Naunsa ba upod ning kongresista sa South nga magsige man lang upod og pangaway ngadto sa mayor bisag wala siya hilabti niini.
Ato na lang atngan kun tinud-on ba sa kongresista ang pagpa-disbar kang Konsehal Edgardo Labella ug ang pagpasaka ni Mayor Michael Rama og kasong libelo batok sa kongresista.
* * *
Gisaway sa kongresista ang mayor tungod kay misakay sa suliran sa mga residente nga demolisonon apan otro upod siya, front seat pa. Nanghatag pa gani siya og salapi ngadto sa mga apektadong lumulopyo. Iyang gisaway ang mayor nga namolitika pero sa iyang gihimo wala ba upod mamolitika ang kongresista? Murag sakto si Mayor Mike Rama sa pagpahilom sa kongresista tungod kay murag wala kini masayod sa iyang gipanulti.