Ang kalikopan ug ang kalamboan

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Ang pagpakabana sa pagpanalipod sa atong kalikopan mao na ang nahimo na nga tipik ug kabahin sa mga programa nga gihan-ay sa atong kagamhanan nga gisanong usab sa nagkadaiyang sektor sa atong katilingban pinaagi sa pagpasiugda og mga kalihokan sama sa pagpananom ug pagpanglimpiyo sa atong palibot.

Naglatid og mga lagda ang atong kagamhanan nga gipahaum sa pagpanalipod sama sa higpit nga pagdili sa pagpataka og labay sa basura, pagdili sa pagputol og kahoy, pagguba sa kabukiran, kasapaan ug kadagatan.

Nunot sa gihingusgang programa sa pagpanalipod sa kalikopan maoy gipatuman nga balaud sa kagamhanan ang Republic Act 9003 kon Solid Waste Management Act maoy gilatid ang mga lagda nga kinahanglan nga pagatumanon sa katawhan ug ang si bisan kinsa nga makalapas nga madakpan dili lang makabayad og multa kun dili mahimo pa nga ibalhog sa bilanggoan.

Taliwala sa pagpatuman sa maong balaod nga naglatid alang sa pagpanalipod sa atong kalikopan dili gayod gihapon ikahiklin ang kahigayonan nga maapektohan ang atong kalikopan.

Daghan ang nag-ingon nga ang maong kalamboan mahimong matagamtam lamang sa katawhan kun motumaw ang gipangtukod nga mga establisamento nga makahatag kanila og trabaho ug makatabang usab sa pagpalambo sa pagpangalagad sa goberno.

Ug kun makahatag man og epekto sa kahimtang sa atong kalikopan ang pagatukoron nga establisamento nga timailhan sa gitinguha nga mga kalamboan asa man kaha niini ang labing maayo alang kanatong mga tawo ang kalikopan o ang kalamboan?