Ayaw'g panuborno

Ang nakaingon kun nganong dili masumpo kining pagpangilkil diha sa mga law enforcers sa karsada kay aduna may mga drayber nga kun madakpan abtik kaayong makakuot sa ilang bulsa aron mosuborno.

Sama sa gihimo sa usa ka Edmund Ang nga human siya madakpi sa mga sakop sa Land Transportation Office-Task Force Alpha (LTO-TFA) didto sa North Reclamation Area kaniadtong miaging gabii, mikuot dayon og kwarta kay isuborno.

Gipara sa LTO deputized agent ang sakyanan nga gimaneho ni Edmund Ang tungod kay “bulhog” kon wala magsiga ang usa sa iyang headlights. Dugay kaayo nga nakahunong bisan og gisinyasan siya layo pa ginamit ang hayag kaayo nga flashlight.

Paghunong sa gimaneho niya nga mini-truck, nasuta pa gayud nga punder ang duha niini ka suga sa luyo nga bahin sa sakyanan. Samtang nagsuwat ang law enforcer sa TOP, miduol si Edmund Ang ug mitanyag nga mohatag lang kuno siya og pang-coffee.

Apan dihang giingnan si Ang sa nagdakop kaniya nga wala kini magkinahanglan sa iyang suborno kay kalooy sa Ginoo daku-daku man siya’g sweldo sa tulo niya ka trabaho, diha pa nga mora’g nauwaw ang maong tawo.

Leksyon sa mga drayber kun madakpan kun wala magsiga ang ilang mga suga kay gipasagdan man nila kini. Hangyoon nako si Edmund Ang nga ayaw na intawon paghimo nga subornohan lang nimo ang modakop nimo kay makapadaghan ni sa mga corrupt nga mananakop.

Kun LTO agents gani ang mopara kaninyo diha sa karsada, ayaw na lang gayud pagtunol kay dili gayud sila modawat, ilabi na og mga sakop sa Task Force Alpha. Tudloan nato ang mga road law enforcers nga dili na mangilkil.

* * *

Miabot sa akong huna-huna kun ngano nga sa subsob nga pagpanakop sa mga sakyanan nga kuwang og mga suga ug ubang accessories, wala man gayud kini mapuo. Duna pa gani uban nga madakpan na lang pagbalik nga wala gihapon ma-corrected ang kakuwangan.

Ingon niini ang sitwasyon. Sa dili pa lukaton ang lisensya, awhagon sa taga LTO ang drayber nga ipa-inspection usa ang ilang sakyanan didto sa LTO Motor Vehicle Inspection Center (MVIC) sa Subangdaku, Mandaue.

Ang tumong niini aron sutaon kun “function” na ba ang iyang mga suga ingon man kun kompleto na ba sa gikinahanglang accessories, sama sa side mirrors, hand brake ug uban pa.

Apan nakahinabi ko og kawani sa LTO nga nadistino sa MVIC nga mitug-an nako nga wala man diay kini sunda ang maong pamaagi. Uy, kun mao kana, nahisama ra nga sigi lang dawat ang gobyerno sa income apan walay pagkausab.

Mao diay tingali nga bisan giunsa og dakop sa mga law enforcers diha sa karsada wala gayud mapuo ang mga dakponon. Sa laktud, ang makakwarta niini mao ra ang mga fixers sa LTO nga nabantayan nako nga mibalik na usab pag-operate.

Akong tawgon ang mga higala nako nga sila si LTO-7 Regional Director Raul Aguilos ug si Assistant Director Arnel Tancinco nga susihon kini. Nagtoo ko nga dunay mga kawani diha sa LTO nga nagpaburot sa ilang bulsa.

Kay giistrikto na man karon sa Commission on Audit (COA) ang pamaagi diha sa LTO, bisan gani ang pag-isyu sa TOP kinahanglan na nga moadto g’yud ang giisyuhan, angay usab nila nga susihon kining maong punto.