EDITORIAL - North Korea mihimo'g trial and error sa ilang bomba

Puwerting dimalasa sa North Korea tungod kay murag rebentador nga basa ang ilang rocket, igo lang nga nakasidlit unya nabungkag sa kahanginan, dayon naimpas ang tanan.

Di baya tiaw ang kadako sa budget nga ilang gigasto alang sa paggama sa maong rocket nga gihalad nila sa ika-100 nga kasaulogan sa adlaw’ng natawhan sa labing unang presidente nga nag-ugmad sa North Korea.

Mao bitaw tingale nga puwerti gyung isoga nila nga ipalupad ang maong rocket nga gituohang gipatabanan og bombang nuclear kay usa man lang diay ka trial and error ang maong pagpalupad.

Wa baya’y nasud nga wa mabalaka sa minaldito nga taras sa taga North Korea tungod kay bisan ang China nga utro usab nga maldito misuway og pabugnaw sa hunahuna sa kadagkoan sa North Korea sa di nalang pagpadayon pagpalupad sa ilang rocket.

Kini sa dihang nasuta nila nga bungkagon kini sa kahanginan sa mga bomba sa South Korea ug Japan nga pulos may blessing sa Estados Unidos.

 Apan ang labi gyung nabalaka mao ang mga Filipino ilabi na ang mga mananagat sa kadagatan sa Luzon ug ang mga abyon nga motadlas sa kahanginan niini aron di madisgrasya sa mga tipaka sa rocket nga mabungkag ug mohagsa sa maong lugar.

May mga nakaingon nga gigabaan ang taga North Korea tungod sa kahasol nga ilang gidalit ngadto sa mga nasud nga nagtuong mapagan sa ilang politikanhong kalihokan.

Duruha ang nakab-ot nga katahap sa kadaghanan, una kun ang pagarpar sa taga North Korea gihimo ba lang tungod lagi kay wa sila’y siguro kun mosaler ba ang ilang bomba

Ikaduha basin gisukod lang nila ang pulso sa mga kontra nilang nasud kun di ba mobahag ang ikog niini sa gipakita nilang kaagresibo, ug dihang nasuta nila nga andam usab diay’ng mokilaw kanila ang ilang mga kontra, sila maoy mipabahag sa ilang ikog ug gituyo nalang nga mabungkag ang maong rocket sulod sa ilang kawanangan aron di sila hambaton sa ilang mga kaatbang. Di ba?