Andam na ang North Korea sa ilang planong pagpalupad sa long-range rocket nga ilang ginganlan og Unha-3 rocket. Gipaabut ang blast off niini kagahapon pa.
Gituhuan nga ang third stage sa maong rocket moboto sa ibabaw sa kadagatan sa Pilipinas. Ang National Risk Reduction and Management Council mipahibawo nga ang gobiyerno nag-andam niini sukad pa niadtong Abril 12 hangtud karon. Unsa man kaandam ang atong gobiyerno sa pagpugong sa kadaut nga dala unya niining maong missile?
* * *
Ang labing dakong barkong igugubat sa Pilipinas, Gregorio del Pilar, nag-atubangay ug ang duha ka mga barko sa China didto sa South China Sea. Nahitabo kini sa dihang gibabagan sa mga barko sa China ang atong navy flagship sa pagdakop unta sa mga mananagat nga Insik nga misulod sa atong giangkong teritoryo sa Scarborough Shoal, 124 nautical miles ang gilay-on gikan sa Luzon.
Way labut sa Pilipinas ug China, giangkon usab kini sa Taiwan, Malaysia, Brunei ug Vietnam. Ang South China Sea gituhuang adunay dakung deposito sa oil ug gas, daghang isda ug mao ang importanteng agianan sa mga barko alang sa global trade.
Mag-ampo kita nga masulbad sa malinawong paagi ang tensiyon didto sa South China Sea tungod kay nasayud kita nga wala kita’y dag-anan sa China kun adunay gubat nga mahitabo. Nagtoo hinoon ako nga nagpanagana usab ang China tungod kay anaa man ang Estados Unidos nga andam moabag sa atong nasud panahon sa kagubot sa South China Sea.
* * *
Sama sa naandan, gipahimuslan sa kadaghanang mga politiko ang pagsaulog nato sa Biyernes Santo. Daghan kanila ang niapil sa pagbatbat sa pito ka pulong ni Hesukristo sa dihang gilansang siya sa krus. Ang uban maoy sponsor sa pagpadangat sa Siete Palabras.
Apan kadaghanan kanila wala mohimo niini aron sa tinuoray nga paghandum sa pag-antus ug pagkamatay ni Kristo sa krus kun dili aron mabati ang ilang ngalan ug mapatik kini sa alimpatakan sa mga botante panahon sa eleksiyon.
Mao kini ang mga tawong mapahimuslanon sa higayon nga mao untay angayang bitayon sa kiliran ni Kristo.
* * *
Karong unang semana sa Oktubre mao na ang filing sa certificate of candidacy sa buot molansar sa eleksiyon sa 2013.
Ato na unyang masayran kun si CITOM chairman Jack Jakosalem ba gayud ang kandidato sa pagka-kongresista sa north district sa Cebu City. Sa Mandaue City wala pa usab masayri kun si kinsa ang kandidato sa pagka-kongresista sa nagkahiusang political family nga Cortes ug Ouano.
Sayud ako nga dili sila mosuporta kang Kong. Luigi Quisumbing, nga magpapili pag-usab. Duha ka tawo ang kanunay nakong madungog nga hisgutan nga maoy mokandidato sa maong pwesto. Sila si Balodong Cortes, ang igsoon ni Mayor Jonas nga nidagan sa maong pwesto sa nilabay nga piniliay ug si Bokal Teddy Ouano.
Bisan si kinsa kanila ang moparang kang Kong. Luigi makahatag gayud og dakung problema sa kongresista tungod kay united na man ang mga dagkung political families batok kaniya.
* * *
Sa segondo distrito, wala pay makabuntog sa liderato ni Kong. Eddie Gullas. Kining damgo ni Mimo Osmeña nga molansar pagka-mayor sa Talisay o kaha pagka-kongresista sa maong distrito, magpabiling damgo lang gayud.
* * *
Nalipay ako nga miduaw kanako, dili pa lang dugay, ang duha ka anak sa akong manghud, Betty Rabacal Carter- nga atua na manimuyo sa Florida, USA. Nagsukliay usab kami og medical info sa akong bayaw, Tony Carter, kalabut sa diabetes. Nakatabang kini'g dako sa pagkontrolar sa akong blood sugar.
* * *
Email: mannyrabacal@yahoo.com