Ang bangag kun anaa sa yuta ug dili masudlan og tubig panahon nga mag-uwan atong kahadlokan sanglit labing suguro man nga nahimo kining pinuy-anan sa mga ilaga, malaa nga mananap sama sa bitin ug uban pa.
Kun dako nga bangag tawgon na kini og langob nga ang tawo nga mosulod nagkinahanglan na og kaisog sa pagbuntog sa mga mananap nga gituohang anaa nagtago sa sulod niini.
Hinuon ang maong matang sa bangag nga atong giingong kahadlokan alang sa tawo nga nagtinguha sa pagsulod kadto lamang atua mahimutang sa taliwala sa lasang o dakong bukid ug daw dili katuohan nga anaa usab sa dagkong dakbayan sama sa dakbayan sa Sugbo.
Ang maong mga bangag nga nahimutang sa dagkong dakbayan maoy bangag nga giingong makayabag kay ang musulod nga niini mao man kadtong mga adik sa paggamit sa illegal nga drugas o suyopanan og shabu.
Kini maoy nahimong dapit nga padulngan sa mga nalambigit sa illegal nga drugas nga ang anaa sa sulod daw sama usab sa mga ilaga nga kun sudlon sa iring moalibwag kini sa pagpanagan ug pipila kanila ang madakpan.
Daghan karon ang nag-ingon nga niining panahon sa taas nga bakasyon angay bantayan sa mga ginikanan ang ilang mga anak nga batan-on kay basin kun matintal sa pagsulod sa maong mga bangag ug kuyaw nga kun pasagdan takulahaw lamang unya kining mayabag.
Matud pa sa mga sakop sa kapolisan nga sa mga dagkong dakbayan sama sa dakbayan sa Sugbo, Lapulapu ug Mandaue adunay ilang namatikdang mga bangag nga ang mosulod nga mga batan-on dili lang molupyo sa maong lugar kun dili gikan usab sa silingang dakbayan.
Ang mga polis nag-ingon nga ang batan-on nga bag-o nga nakat-on sa pagsulod sa maong mga bangag dali kaayong mailhan sa ilang ginikanan kay mahimo na kining sabaan, kilas nga manglihoklihok ug daw wala na kini sa iyang kaugalingon.
Sa laktod nagsugod na kini og kayabag kay nakat-on na man sa paggamit sa illegal nga drugas.