Lahi nga paghugawhugaw sa kadalanan

Gihingusgan karon sa kagamhanan ang paglimpiyo sa kadalanan nga maoy hinungdan nga adunay ilang gidistino nga mga sakop sa clean and green nga mga kawani nga sayo pa sa kaadlawon atong mamatikdan nga manilhig na sa kadalanan sa paghipos sa nagpasad nga mga sagbot.

Nunot sa maong tinguha sa atong kagamhanan adunay laing matang sa paghugawhugaw nga dili madala og silhig sa gidistino nga mga sakop sa clean and green tungod kay gisulat man man kini pinaagi sa pintal.

Kini atong makita nga anaa mahimutang sa mga koral nga semento, bongbong sa dagkong building nga nahimutang sa daplin dalan ug uban pa.

Ang maong matang sa paghugawhugaw dili dali nga himoon sa mga naghimo niini tungod kay gigahinan kini og pipila ka mga oras ang ilang pagpintal niiini.

Nagkalainlain lamang ang matang sa pagpintal sa maong mga gisulat nga atong makita sa mga bongbong ug mga koral nga semento nga ang uban nag-ingon nga gihimo kini sa dili mga ordinaryong grupo sa mga batan-on sanglit sagad kanila nalambigit man sa paggamit sa illegal nga drugas.

Giingon nilang nalambigit sa paggamit sa ginadiling drugas tungod kay ang mga batan-on nga wala malambigit sa paggamit og illegal nga drugas dili man usab makahimo sa paghimo sa maong matang sa paghugawhugaw.

Gitumbok usab nga grupo sa mga batan-on nga nalambigit sa paggamit sa ginadiling drugas ang naghimo sa ingon tungod kay maisip man nga talagsaon kun ang usa ka senior citizen nga mag-adik-adik ug maghugawhugaw pinaagi sa pagpataka og sulat sa bongbong o koral nga semento nga maoy gamiton ang pintal.

Nunot niini adunay pipila ka mga polis ang nag-ingon nga ang mga dapit nga makita ang daghang gipangsulat-sulat sa koral nga semento o mga bongbong nga gigamit ang pintal mao usab ang ilang timailhan nga sa maong dapit kusog ang pagpamaligya sa illegal nga drugas ug daghan ang mga adik.