Ang pagtumaw sa mga isdang butanding

Dili ikalimod nga nahimo na karong sentro sa pagtagad sa mga opisyal sa kagamhanan ang talagsaong pagtumaw sa ilang kadagatan sa dagkong mga isda nga gitawag og butanding ug gani nahimo na man kining tourist attraction.

Ang nag-unang dapit dinhi sa Sugbo nga nagpakita ang maong matang sa mga isda mao ang lungsod sa Oslob nga mao usab karon ang gidugokan sa pagbisita dili lang sa lokal nga mga dumoduong kun dili lakip na sa mga langyaw nga turista.

Dili pa dugay adunay migawas nga taho nga dili lamang diay sa lungsod sa Oslob mopakita ang maong mga isda tungod kay gikataho man usab nga nagpakita man usab kini sa silingan pa nga mga lungsod sama sa Moalboal ug uban pa.

Ang pagpakita niining talagsaong matang sa mga isda daw nakapahingangha kaayo sa mga tawo nga maoy hinungdan daw dili matukib ilang kalipay ang paghikap, pagsakay ug ang magpakuha og hulagway nga tupad gayod sa maong matang sa mga isda. Ang mga opisyal sa kagamhanan sa lungsod sa Oslob nga ang ilang kadagatan maoy nag-una nga gipakitaan sa maong matang sa mga isda kasamtangan na karong naglatid og mga lagda. Gitumong ang maong mga lagda alang sa paghatag og kahapsay ug kasiguroan nga dili matugaw ang maong mga isda ug magpadayon kini sa ilang pagpakita.

Nabahin hinuon ang mga reaksiyon sa pipila ka mga molupyo sa maong dapit tungod kay adunay gibati og kahinangop ug adunay  gibati usab og kabalaka. Ang gibati og kabalaka miingon nga ang pagpakita sa mga isdang butanding sa ilang dapit mao usab ang nakaingon sa pagdagsang sa mga tawo nga nakaingon usab sa pag-usbaw sa mga baligya sama sa pagkaon ug ilimnon.

Nunot sa pagpakita sa mga isdang butanding sa mga lungsod sa habagatang bahin sa lalawigan, dili usab kalikayan nga adunay nakapangutana kun nagpakita ba usab ang maong matang sa mga isda sa mga amihanang bahin sa lalawigan nga naglakip na sa mga isla sa Camotes ug Bantayan kay kun wala kini mopakita unsa man kaha ang hinungdan tungod ba kaha kay sa maong mga dapit natugaw ilang kadagatan sa mga boto sa dinamita nga nakapaislag usab sa maong matang sa mga isda.