Sana-sana sa Panglao

Sitio Daorong, Barangay Danao, Panglao, Bohol—Dihang nangagda ang akong asawa nga ari mi mamakasyon sa Bluewater Panglao Beach Resort, kabalibaron ko niya. Kay kapila na mi nagbalikbalik sa Bohol, unsa pa may bag-o namong makit-an?

Apan usa sa mahinungdanong mga leksiyon nga akong nakat-onan sa kaminyuon mao nga sakto ang mga asawa. Sa tanang higayon. Maong kadlawon pa lang sa Huwebes Santo, nangmata na mi aron pagkuyog sa tibuok pamilya ni Austrian Consul Arcadio “Dodong” Alegrado ug sa iyang anak nga si Julie Alegrado-Vergara. Alang sa tunga sa adlaw nga biyahe paingon sa Panglao agi sa mga pantalan sa Taloot, Argao sa habagatang Sugbo ug sa Catagbacan, Loon.

* * *

Unang bag-o nakong nadiskubrehan mao ang kalami sa among gihapit nga inasal nga baboy sa Carcar City. Matud pang Jovi Alegrado, manghod ni Julie, ang mantika nga nidagayday gikan sa inasal gisawod ug gisagol sa tuslobanan. Sa wa pang katilaw, puwerte gyong lamia.

Mao nga ang among sabot sa akong asawa nga di mangaon og karne sa tibuok kuwaresma, salamat sa kamaayong mangumbinser ni Consul Alegrado, sa kalami sa inasal ug sa kainit sa dagkong puso, nabugto niadtong sayong buntag sa Huwebes Santo sa pantalan sa Taloot, diin nagpaabot mi sa ferry sa Lite Shipping nga motabok sa among sakyanan paingon sa Catagbacan.

* * *

Ikaduhang bag-o nakong nadiskubrehan mao ang mas baga ug hayag nga mga aninipot sa Bohol. Nanakay mi og bangka nga may atop sa dakong suba sa Abatan, nga nilatas sa mga lungsod sa Cortes ug Maribojoc, human sa sayo namong panihapon niadtong Huwebes.

Bisan takdol ang buwan ug hayag ang tibuok palibot, niamag ang talagsaong kahayag sa minilyon ka aninipot sa mga punoan sa pagatpat sa daplin sa suba. Lahi sa mga aninipot sa suba sa Iwahig sa Palawan nga kinahanglang unhan og amag sa flash sa camera una mobawos pagsiga, ang mga aninipot sa Abatan makanunayon nga nidan-ag sa pinili nga mga bahin sa labong nga pagatpatan.

* * *

Ikatulong bag-o nakong nadiskubrehan mao ang “Sana-Sana.” Mao ni ang nakalimtan nang ritwal sa di pa ang pagtukaw ug “Sugat” sa pagkabanhaw sa namatay natong Manunubos. Padayon ning gihimo sa Parokya ni San Agustin sa Panglao. Sayong gabii sa Sabado, gagmay’ng mga bata nga nagrepresentar sa nagkalainlaing barangay manganta og Latin samtang iisa sa habog nga bitayanan atubangan sa simbahan.

Kasagaran sa mga bata di katarung og kanta samtang gibitay. Apan wa ning kababag sa mga ginikanan pag-andam sa ilang mga anak alang sa tinuig nga panagtigi dayong tungang gabii, kanus-a magsugod na ang Easter Vigil. Ang labing maayo sa mga bata pasidunggan sa talagsaong kahigayonan nga maoy bitayon ug pakantahon sa mabulukong “Sugat” sa Pasko sa Pagkabanhaw.

* * *

Email: [email protected]