Human sa Kagabhion

Abril 8, 2012: Domingo sa Pasko sa Pagkabanhaw

Mga Pagbasa: Buh.10:34, 37-43/Sal.118/1 Cor.5:6-8/Jn.20:1-9

Ang Domingo sa Pasko sa Pagkabanhaw ang nipahinumdom kanato nga nahuman na ang kagabhion sa Kamatayon. Timaan nga siya Dios sa mga buhi ug dili sa mga patay.

Kabubut-on sa Dios nga kita magpuyo sa kinabuhing madagayaon. Ayaw himoang babag ang sala aron mahimo kang bag-o sa kinabuhi ug magpakabuhi.

Adlaw sa paghinuklog

Dakong selebrasyon karong adlawa sa mga Kristiyano sa tibuok kalibotan. Kini gumikan sa pagkabanhaw sa atong manunubos nga si Kristo Hesus. Tungod kay Easter karon, puno ang mga pampublikong lugar sama sa mga beach resort, plaza, shopping malls, ug uban pa.

 Taliwala niining atong mga pagsadya karon, angay usab natong hinuktokan ang kamatayon ni Kristo. Ug ngano nga nagpakamatay siya sa krus mao unta kana ang sentro sa atong mga pagpangaliya ngadto kaniya.

Ngano bang nagpakamatay si Kristo? Kini tungod sa pagkalunang sa tawo sa tumang kasal-anan. Gusto niyang mahinloan kita sa atong mga sala. Kini aron sa ingon nga makabaton kita og kinabuhing dayon.  

Dili ko pari o pastor nga eksperto sa Bibliya ug sarang ninyo nga tuohan. Usa lamang akong ordinary nga manunulat nga adunay gamay ug limitadong kinaadman sa mga mensahe sa Balaang Kasulatan.

Hinuon niadtong gamay’ng pa akong bata, ambisyon ko nang mamahimong pastor sa Seventh-Day Adventist, ang among relihiyon. Apan sama sa bulang nahanaw ang maong ambisyon nga wala gayud matuman. 

Kini gumikan sa akong problema nga dili kahibalo mosulti atubangan sa publiko. Mosalapid man gud akong dila hinungdan nga makulbaan ko kun mao nay motungtong sa pulpito atubangan sa mga tawo.

Tungod kay wala na may kasigurohan nga matuman pa ang akong ambisyon nga mamahimong pastor, midesider kong manimpalad og lain linya sa kinabuhi. Kaluoy sa Ginoo nga misaler usab ang akong mga paningkamot sa dihang misulod na ako sa kalibotan sa diyornalismo sa dekada nubeyienta.

Bitaw. Usa lamang ang atong dag-anan ning atong paglawig sa kalibotan nga napuno sa mga kasal-anan. Kini mao ang atong   pagsandig ug pagbulig ngadto sa atong labaw nga makagagahum.

Mao lamang kini ang paagi aron kita makabaton og kinabuhing dayon. Kini kun gusto kitang tawgon nga mga anak sa Ginoo.

Niining pagselebrar sa mga Kristiyano sa Pasko sa Pagkabanhaw, angay lamang natong hinuklogan ngano nga kinahanglan pa ni Kristo nga iula ang iyang dugo didto sa kalbaryo sa krus alang sa atong kaluwasan.